Rabiguet

Goyee ro ná índice xtuny contenidos

 LESIONY 53

Jehoiadá gop balory

Jehoiadá gop balory

Jezabel gopbu toib xiindzapbu ni góc laa Atalía né gócbu buñ mal xomodca xinaʼbu. Atalía bitzñabu né rey xtuny Judá. Órni goity reycu xiimbu gosaló buny mandary xalagarybu. Né órni goity xiin reycu, Atalía biaʼan xalagarybu. Par diti ñoʼ ni nabeʼ galmandarycu láabu, biyopybu mod nagaitybu guirá xiin rey xtuny Judá né stipnés buñ ni labúu ñony mandary xalagarybu. ¡Dada bigaitybu xiacbu! Por ngú guirá buñ bidzuiby láabu.

Sumo sacerdote Jehoiadá né tzeelbu Jehoseba gonbu que guirá ni cayony Atalía mal láani. Por ngú bicachlanbu toibtica xiac Atalía ni góc laa Jehoás, ná goyoʼyibu ló riesga. Bisniʼsyibu Jehoás lainy templo.

Órni Jehoás gop gatz íz, Jehoiadá bitop guirá ni gosanir nisló soldad né levitas. Né goniʼbu: «Colgap roʼ templo né diti guiduidyto lagary tzoʼ ni toib buñ». Ór cú Jehoiadá goloʼbu coronacu guic Jehoás par ñacbu rey xtuny Judá. Buñ gudx Judá bicaʼyibu rudx: «¡Gonyxiroʼno rey!».

Reina Atalía bicadiagbu cacaʼ buñ rudx né órcuca goyeebu lainy templo. Órni bibiʼbu reycu bicaʼbu rudx: «¡Cacalóyibu naʼ! ¡Cacalóyibu naʼ!». Ni gosanir nisló soldad goleʼyibu Atalía né bigaityibu Atalía. Láabu nigolú bikíilbu buñ ñony cós mal. ¿Xí góc después ni goitybu?

Jehoiadá gocnébu gudxcú par ñony toib acuerdo né Jehová. Ló acuerdocu layibu goniʼyibu que nosi Jehová sienyibu. Jehoiadá buny que nanitlóyibu xquidaʼ Baal né xtioxhyibu. Golúbu sacerdotes né levitas ni labúu ñony dxiin lainy  templo par ñenyibu Jehová stoib lagarycu. Láaca golúbu buñ par ñap roʼ yoʼcu par diti ñoʼ buñ ni ñony buidy lidx Jehová. Órcuca Jehoiadá né buñ ni gosanir nisló soldad goynéyibu Jehoás ronoʼ palacio né gorúbu ló trono. Buñ gudx Judá nigolú bibaladx. Ma labúu bienyibu Jehová goxtiguie portín ma goity Atalía ni góc toib gonaʼ mal né ma diti goyoʼ buñ ni bieen dioxh falz ni góc laa Baal. ¿Gop Jehoiadá balory la? ¿Raduidylo cuent que por ni gopbu balory gocnébu xidalguixo buñ la?

«Diti guidzuibyto ni ragaity cuerpo per diti labúu ragaity alma; xalagary ngú, colguidzuiby ni labúu ranitló alma né cuerpo ló Gehena» (Mateo 10:28).