Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 47

Jehová gocnébu Elías

Jehová gocnébu Elías

Jezabel nigolú bidzuitzbu órni gonbu que Elías bigaity xidal profetas xtuny Baal. Por ngú bixelbu toib buñ ñee nigudx Elías: «Guixí saitylo, xomodca profetas xtuny Baal». Elías nigolú bidzuiby né bixonybu goyeebu ló yoovich. Cú goninébu Dios né goniʼbu: «Jehová, ma diti labúu soni xchiinlo más. Biduidy lagary gati». Né gonás bacaʼal láabu xan toib yac, portín nigolú ma bidzagbu.

Per toib ángel goleʼ bacaʼal lobu, né diitz nadaʼdot gochbu Elías: «Biás né godó». Elías biás né bibiʼ toib páa ni cadzaʼ ló guiee, né láaca bibiʼbu toib ruʼ ni nap nís. Elías godó, goʼ né gotiasy stoib. Ángelcu bicuany láabu stoib né góoch láabu: «Godó, raquiin gaplo fuers par guidxinlo ro non tzeelo». Elías godó más né después gosaabu 40 dzú né 40 goxin dada bidxinbu dainy Horeb. Bioʼbu lainy toib bileʼ par gaisybu, ór cú Jehová gonabdiitz láabu: «Elías, ¿xí ronylo reʼ?». Elías cuapy: «Israelitas diti buny cumplir xtiitz. Ma bichílyibu altar xtunylo né ma bigaityibu profetas xtunylo. Né nigoreʼ láaca ma náyibu guigaityibu naʼ».

Jehová gochbu Elías: «Bireʼ né gosagaʼ ñeʼ dainy reʼ». Elías bireʼ, ór cú bilopy toib buroʼdant, godudy toib xo rodann né después toib guii. De ngú Elías bicadiag toib rudx nadaʼdot, né Elías bisieg lóo né xhap. Jehová gonabdiitz láabu xigony bixonybu. Elías cuapy: «Ma nosi naʼ naca profeta xtunylo ni yása gaity». Per Jehová góoch láabu: «Diti noʼlo toiblo. Noʼsa 7.000 buñ lainy gudx Israel ni cayen naʼ. Goyee né góoch Eliseo que ma golúya láabu par gacbu profeta xalagarylo». Órcuca bunybu ni bixel Jehová láabu. Looy xí nálo, ¿labúu sacné Jehová looy pal rasoblo láabu la? Scú, labúu sonybu láani. Nigoreʼ guisuidyno xí buny Elías órni diti góc guié gudx Israel.

«Diti tzoʼto ló galrrasaʼ por nitisi cós, ni gonyto ngú guininéto, guinabto lóo Dios né guiduidyto guixquix láabu; modreʼ Dios gan xi canabto» (Filipenses 4:6).