Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 46

Ni góc laidy dainy Carmelo

Ni góc laidy dainy Carmelo

Gobierno xtuny Israel ro goyoʼ 10 family, gopyibu xidal rey mal. Per Acab ngú ni buny más cós mal que guiráyibu. Bunybu galtzeʼel né toib buñgonaʼ ni bieen dioxh falz, gonaʼ reʼ góc laa Jezabel. Acab né Jezabel bunyibu que xidal buñ bieen dioxh ni góc laa Baal, láaca bigaitybu xidal profetas xtuny Jehová. ¿Xí buny Jehová ór cú? Bixelbu profeta Elías naniné Acab.

Elías gochbu Acab que diti sac guié gudx Israel portín Acab nac toib rey mal. Más de tzón íz diti biquiin guirá ni bisagaʼyibu né ni bidxiʼpyibu ló xaliooyibu, né por ngú goyoʼ galrralán gudx Israel. Después Jehová bixelbu Elías par naninébu Acab stoib. Acab gochbu Elías: «Rayopylo galrradíil. Xtolo diti cayac guié». Elías cuapy: «Diti naʼ napa dool. Diti cayac guié portín looy rienlo Baal. Bitop guiráca buñ gudx reʼ né guiráca profetas xtuny Baal né goyné layibu laidy dainy Carmelo. Né cú guibiʼno chú láabu ngú Dios ni nigolú».

Guirá buñ bidop laidy dainycu né ór cú Elías góoch layibu: «Nigoreʼ colcoʼ guicto chú guiento. Pal Jehová nac Dios ni nigolú, colguien láabu. Per pal Baal nac dioxh ni nigolú, colguien Baal. Modreʼ ganno láani: guiráca 450 profetas xtuny Baal gonytzaayibu toib galrrascad né guinabyibu lóo xtioxhyibu. Naʼ láaca gonytzaay toib galrrascad né guinaba lóo Jehová. Dios ni guicapy né guixel toib guii ngú Dios ni nigolú». Guirá buñ gosaguel ni goniʼ Elías.

Ór cú profetas xtuny Baal bunytzaayibu toib galrrascad. Bicaʼyibu rudx xtioxhyibu guidopynac dzú né goniʼyibu scareʼ: «¡Baal, cuapy lóodo!». Órni Baal diti cuapy, Elías gosaló bixiichbu Baal né goniʼbu: «Colguicaʼ rudx láabu né guidopy xfuersto. Sigory gonás bacaʼal láabu né raquiin tzoʼ ni guicuany láabu». Órni mápa tzoʼ gueʼel, profetas xtuny Baal bicaʼrayibu rudx, per láabu diti cuapybu.

Elías godiʼx galrrascad ni bunytzaay ló toib altar né bixúbu siil nís loni. Ór cú gonabbu lóo Dios: «Jehová, cuapy naʼ, par gan gudx reʼ que looy naclo Dios ni nigolú». Órcuca Jehová buny que guii bietj de guibá né bisaʼijni galrrascad xtuny Elías. Buñ bicaʼ rudx: «¡Jehová nac Dios ni nigolú!».  Ór cú Elías goniʼ: «Colguigaity guiráca profetas xtuny Baal, diti guiduidyto lagary guilaa ni toib». Dzúcu bigaityibu 450 profetas xtuny Baal.

Después bienlóo Elías toib xcaay mitien lainy guibá niis ronoʼ nisdaʼ, né gochbu Acab: «Sac toib guiéguisioʼo. Biaʼpy lainy xcamionlo né goyee lidxlo». Goyoʼ xcaaydiguieʼ lainy guibá né gosaló toib buroʼdant né guiéguisioʼo. Dada ór cú biab guié. Acab biaʼpy lainy xcamión né bixonybu seebu lidxbu, per Jehová gocnébu Elías par naxonybu más naguel que xcamión Acab. Per ¿cuti bilox guirá galnagan ni gop Elías la? Guibiʼno guidoni.

«Par gan buñ que, looy, laalo ngú Jehová, nosi looy ngú ni noʼ más Guiaʼ ló guidopynac gudxlio» (Salmo 83:18).