Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 43

Galkié ni buny rey David

Galkié ni buny rey David

Órni goity Saúl, David goyoʼ xalagarybu né gopbu 30 íz órni gosalóbu buny mandarybu. Órni ma xidzú cayony mandarybu, toibtica gueʼel órni casaabu guic palacio xtunybu bibiʼbu toib buñgonaʼ móz. David gon que laabu Batseba né tzeelbu nac toib soldad ni laa Urías. David bixelcaʼbu Batseba né gotnébu gonaʼ reʼ né gonaʼ reʼ gocxiin. David biyopy mod nacach xcalkié. Né gochbu buñ ni gosanir nisló soldad nasagaʼbu Urías nisló guirá soldad ló guerr né nasiambu Urías toib. Urías goity ló guerrcu né después David buñ galtzeʼel né Batseba.

Per Jehová bibiʼ guirá Galkié ni buny rey David. ¿Xí buny Jehová ór cú? Bixelbu profeta Natán par naniné David. Natán góoch láabu: «Goyoʼ toib buñ ric ni gop xidal xiil né láaca goyoʼ toib buñ pobre ni gop nosi toib xilieen ni gondxiʼdotbu. Buñ ric cú gohx xilieen ni gop xoʼyencu». David bidzuitzgoluʼ né goniʼ: «¡Buñ ric cú non gaitybu!». Ór cú Natán góoch láabu: «¡Looy naclo xomod buñ ric cú!». Nigolú bioʼob xcalnabany David né gochbu Natán: «Buni toib galkié rodann nisló Jehová». Galkié ni bunybu goloʼni xiroʼ galnagan ronoʼbu né ronoʼ xfamilbu. ¿Xigony diti bigaity Jehová láabu? Portín gócbu buñdxo né góc arrepentirbu. Ná scú Jehová buny que naguiixbu galkié ni bunybu.

David goniiny nasaʼ toib yoʼ ro ñenyibu Jehová. Per Jehová golúbu xiin David ni góc laa Salomón par nasaʼ láani. David  gosaló bitop tipnés cós par naquiin Salomón né goniʼbu: «Yoʼ ni tzaʼ par Jehová non gacni sacróyen. Mbioxhlasa nac Salomón, per naʼ guitopa tipnés cós ni guiquimbu par gacnéya láabu». David biscad xiroʼ bidxiich par ñaʼ yoʼcu. Biyopybu buñ ni nan rony dxiin. Bitoplóbu or né plata, né goycaʼyibu yacdaʼ de Tiro né Sidón. Órni ma yaaca gaitybu, biduidybu toib guiich Salomón ro sieed ximod nasaʼbu yoʼcu né goniʼbu: «Jehová góoch naʼ ximodpa tzaʼ yoʼ reʼ né gochbu naʼ nadudi láani looy. Láabu sacnébu looy. Diti guidzuibylo. Góc nadip né buny dxiinreʼ».

«Ni racach xcalkié diti sarebuʼ ni gony, per ni raset né rasian láani sacaʼ galrronladx» (Proverbios 28:13).