Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 40

David né Goliat

David né Goliat

Jehová gochbu Samuel: «Goyee lidx Jesé. Toibtica xiingaʼnbu sadxin sony mandary gudx Israel». Ór cú Samuel goyee. Órni bibiʼbu xiin lagol Jesé, bunybu pensary: «Ndeʼ ni ma golú Jehová». Per Jehová gochbu Samuel que diti ma golúbu xiin lagol Jesé, né goniʼbu: «Naʼ rabiʼya ni noʼ lainy xcalnabany buñ, diti nosi mod nac lóo buñ».

Jesé bixelcaʼ xhoop xiin par nadxin nisló Samuel. Per Samuel góoch láabu: «Jehová diti ma golú ni toibyibu. ¿Noʼ más xiinlo la?». Jesé cuapy láabu: «Noʼ stoib xiinna ni más lahuin ni laa David. Láabu satapbu xiil». Órni David bidxin, Jehová gochbu Samuel: «¡Ndeʼ láabu!». Samuel bigotz aceity guic David, modreʼ bislooybu que David sony mandary gudx Israel.

Godudy chop tzón íz, israelitas gosaló godíil né filisteos. Buñ filisteos gop toib soldad ni nigolú nasoʼ ni góc laa Goliat. Guirá dzú, Goliat buny borla israelitas né bicaʼbu rudx: «Colguixel toib ni tíil né naʼ. Pal ronybu gan naʼ, sacdo xomósto. Per pal naʼ rony gan láabu, lóoto sadxin sacto xomósdo».

David goyné galrro ronoʼ guirá buch ro cadíilyibu né filisteos. Bicadiagbu guirá ni goniʼ Goliat né goniʼbu: «Naʼ guicalóya láabu». Saúl góoch láabu: «Per toib mbioxhlasiensa looy». David cuapy láabu: «Jehová sacné naʼ».

Saúl cuaʼbu xhapbu ni rocbu órni rieebu guerr né biguacbu láani David, per David  góoch láabu: «Diti labúu sadila né guirá ndeʼ». David cuaʼ toib guiʼix bixil, láani ngú toib doʼ ni raquiin buñ par guisal buñ guiee. Goyeebu bitopbu gáay guiee ni nadxipdoot laidy roʼ toib golas, né goloʼbu láani lainy xpoxhbu. Ór cú David bixony see ronoʼ Goliat. Ór cú Goliat góoch láabu: «Godaʼ nidxi né guidudi beʼel laidylo guá nimal ni rasapy né stipnés nimal guiʼix». David diti bidzuiby né cuapybu Goliat: «Looy cacalólo naʼ né toib espad né toib lanza, per naʼ cacalóya looy né xcalrracné Jehová. Diti lóodo ngú ni cacalólo, looy cacalólo Dios. Guirá buñ san que Jehová más nadipbu que toib espad o toib lanza. Láabu sacantabu lóoto nislódo».

David goloʼ toib guiee lainy guiʼx bixil xtuny né bisalbu láani ronoʼ Goliat né guidopy xfuersbu. Né xcalrracné Jehová guieecu cuáni lacaa Goliat né láabu biabbu layoo né goitybu. Guirá filisteos bidzuiby né bixony. ¿Né looyga? ¿Naplo confianz lóo Jehová xomod David la?

«Par buñgudxlio diti labúuni, per diti scú nacni par Dios, portín par Dios guirá cós labúuni» (Marcos 10:27).