Rabiguet

Goyee ro ná índice xtuny contenidos

 LESIONY 29

Jehová golúbu Josué

Jehová golúbu Josué

Moisés gosanir nisló israelitas por xidzú íz per órni ma yaaca gaitybu, Jehová góoch láabu: «Diti looy sagoʼlo israelitas ló layoo ni bidudi xtiidza guicaʼyibu. Per sadudi lagary guibiʼlo láani». Ór cú Moisés gonabbu Jehová nabú toib buñ ni nasanir nisló xcudxbu. Jehová cuapy láabu: «Goniné Josué né góoch láabu que ma golúya láabu».

Moisés gochbu guirá israelitas que mápa mer gaitybu né que Jehová ma golúbu Josué par coʼ layibu ló Layoo ni Dios Biduidy xtiitz guicaʼyibu. Ór cú Moisés gochbu Josué: «Diti guidzuibylo. Jehová sacné looy». Ló goxeʼsi dzú, Moisés biaʼpy guic dainy Nebo né cú Jehová bilooy láabu layoo ni biduidybu xtiitzbu guicaʼ Abrahán, Isaac né Jacob. Moisés gop 120 íz órni goity.

Jehová gochbu Josué: «Godudy guʼuc Jordán né goyoʼ ló xalioo Canaán. Naʼ gacnéya looy xomod gocnéya Moisés. Diti guialadxlo goʼol lo Ley xtuni guiráxadit dzú. Diti guidzuibylo, non gaplo balory. Goyee né buny guirá ni ma goodxi looy gonylo».

Josué bixelbu chop buñ ñee naláach gudx Jericó. Ló stoib historia ni sieed guisuidyno xi más góc.  Órni bibiguet chop buñ ni goyláach Jericó, goniʼyibu que ma labúu tzoʼyibu lainy xalioo Canaán. Stoib dzúcu, Josué góoch layibu ñoʼyibu puext par nadudyibu guʼuc Jordán. Primer bixelbu sacerdotes nasanir né arca xtuny acuerdo par nadudyibu guʼuc Jordán. Ló dzúcu nigolú goniʼs guʼuc Jordán né dada rabixni, per órni sacerdotes biquichñeʼyibu ló xinísni, nís cú gosaló biaʼach loni né bibichni. Ór cú sacerdotes gosaayibu galay guʼuc cú. Órni bidxinyibu galaʼni, gosagadzuyibu né golésyibu dada bilox godudy guirá buñ israelitas stiplad. Xpensarylo órni bibiʼyibu galrradziguiaʼcu, ¿bisetnaladxyibu ni buny Jehová ló nisdaʼ Xináa la?

Después de xidal íz, orcúra israelitas goyoʼyibu ló Layoo ni Dios Biduidy xtiitz guicaʼyibu. Ór cú ma labúu bisaʼyibu lidxyibu né ma labúu gopyibu xcudxpayibu. Labúu goloʼyibu binii ló xaliooyibu, bisagaʼyibu labaa balach né stipnés cós. Ló layoocu goyoʼ xchiin búscer né lech.

«Jehová guirá ór sagonés looy né saduidy guirá ni caquiinlo ná pal noʼlo ló yoovich» (Isaías 58:11).