Rabiguet

Goyee ro ná índice xtuny contenidos

 LESIONY 34

Gedeón bunybu gan madianitas

Gedeón bunybu gan madianitas

Después, israelitas golsityibu de Jehová né gosaló bienyibu dioxh falz. Por gatz íz, buñ de gudx Madián golann xinimalyibu né binitló xcosechyibu. Guirá israelitas bicachlanyibu lainy bileʼ né laidy dainy par diti ñoʼ xí ñony buñ madianitas layibu. Bidxin midid, gudx Israel gonabyibu lóo Jehová guilaa layibu. Por ngú Jehová bixel toib ángel par ñaibybu toib mbioxhlas ni góc laa Gedeón: «Jehová ma golú looy par gaclo toib buñguieeu nadip ni tíil por gudx Israel». Gedeón gonabdiitz láabu: «Naʼ diti naca toib buñxirop, ¿ximod guilaaya gudx Israel?».

¿Ximod gon Gedeón que Jehová ma golú láabu? Cuaʼbu tlaʼ lairy ni goyaʼ de guitzlaidy xiil né godiʼxbu láani layoo ór cú gochbu Jehová: «Pal guixisil ma bigadz gopgueʼel láani per layoo nabich, ór cú saana que ma golúlo naʼ». Órni birá gueʼel, lairycu nigolú godzni, per layoo diti godz. Ór cú Gedeón gonabbu Jehová que stoib dzúcu lairycu diti ñadzni per layoo ro náaxni ñadz. Jehová buny láani scú. Orcúra Gedeón gon que Jehová ma golú láabu. Por ngú bitopbu guirá soldadbu par guicalóyibu madianitas.

 Jehová gochbu Gedeón: «Naʼ sacnéya israelitas par gony gan. Per napto xidalguixo soldad, por ngú labúu sonyto pensary que por stiplóocato cayonyto gan. Más galán góoch guirá ni radzuiby guibiguet lidx». Por ngú 22.000 soldad bibiguet lidx né 10.000 biaʼan né Gedeón. Ór cú Jehová góoch láabu: «Napsalo xidalguixo soldad. Goyné layibu roʼ guʼuc né góoch layibu gueʼyibu nís. Nosi biané soldad ni rioʼ naní órni reʼ nís». Nosi 300 soldad goyoʼ naní laʼga goʼ nís. Jehová biduidy xtiitz que nosi layibu sonyibu gan 135.000 soldad madianitas.

Goxincu Jehová gochbu Gedeón: «Ma bidxin ór par guicalóto buñ madianitas». Gedeón bunycuent dxityoos layibu né ruʼ ni noʼ antorcha lainy, né góoch layibu: «Colguibiʼ né colgony ni cayoni». Gedeón bicudx dxityoos, golaʼbu ruʼ ni sanébu né bisisbu antorcha xtunybu né bicaʼbu rudx: «¡Espad xtuny Jehová né xtuny Gedeón!». Guirá 300 soldadcu buny scúca. Madianitas nigolú bidzuibyibu né biretzlasyibu. Binit xcalrrienyibu né cualóyibu xcompañercayibu. Ndeʼ góc stoib buelt ni Jehová gocné israelitas ñony gan xi enemig.

«Galnadip ni buñ diti nap guienni que sieedni de Dios diti de lóono» (2 Corintios 4:7).