Rabiguet

Goyee ro ná índice xtuny contenidos

 LESIONY 37

Jehová goninébu Samuel

Jehová goninébu Samuel

Sumo sacerdote ni góc laa Elí gop chop xiingaʼn ni buny dxiin lainy tabernáculo. Góc laayibu Hofní né Finehás. Layibu diti bisobyibu xiley Jehová né diti binladxyibu buñ. Órni israelitas goynéyibu galrrascad par Jehová, Hofní né Finehás rianéyibu beʼel ni más galán nac par guáyibu. Elí gon xí guirá buny xiimbu, per diti bunybu xitcal. Xpensarylo, ¿natuidy Jehová láani scásiʼ la?

Ná Samuel más lahuinbu que Hofní né Finehás, diti bisuʼbu biinreʼ. Jehová bioladx mod góc Samuel. Toibtica goxin laʼga natiasybu, bicadiagbu toib rudx. Biásbu né bixonybu goyeebu ronoʼ Elí né goniʼbu: «¡Reʼ noʼya!». Per Elí cuapy: «Naʼ diti bicarudxi looy. Bibiguet goʼot». Samuel bibiguet ló xiloʼon. Ór cú bicadiagbu rudxcu ni rarop buelt. Órni Samuel bicadiag rudxcu ni rion buelt, Elí biduidy cuent que Jehová ngú ni goniné Samuel. Elí gochbu Samuel que pal nacadiagbu rudxcu stoib, nacapybu: «Goniʼ, Jehová. Cacadiaga looy».

Samuel bibiguet ló xiloʼon stoib. Ór cú bicadiagbu toib rudx ni goniʼ: «¡Samuel! ¡Samuel!». Láabu cuapybu: «Goniʼ, Jehová.  Cacadiaga looy». Jehová goniʼ: «Góoch Elí que sony castigar láabu né xfamilybu. Láabu nanbu xi guirá cós mal cayony xiimbu lainy tabernáculo ná scú diti ronybu xitcal». Birá gueʼelcu Samuel bixal xpuert tabernáculo xomod ronybu guirá dzú. Samuel bidzuibybu ñaibybu sumo sacerdote ni goniʼ Jehová. Per Elí gonabdiitz láabu: «Xiingaʼna, ¿xí góoch Jehová looy? Góoch guiráni naʼ». Ór cú Samuel biset guirá ni goniʼ Jehová.

Samuel goniʼs, né Jehová diti bisian láabu. Israelitas de guirá lad gonyibu que Jehová golú a Samuel par gac toib profeta né juez.

«Nigoreʼ ni naclo mbioxhlas, bisetnaladx ni Bisaʼ looy» (Eclesiastés 12:1).