Rabiguet

Goyee ro ná índice xtuny contenidos

 LESIONY 24

Diti buny cumpliryibu xtiitzyibu

Diti buny cumpliryibu xtiitzyibu

Jehová gochbu Moisés: «Biaʼpy laidy dainy ronoʼya. Guicaʼya guirá ley xtuni ló toib guiee tabla né gonycuenta láani looy». Moisés biaʼpybu laidy dainycu né goclabu lagarycu 40 dzú né 40 goxin. Laʼga goyoʼbu lagarycu, Jehová bicaʼ Chii Mandamientos ló toib guiee tabla né bunycuentbu láani Moisés.

Godudy chop tzón govitz né ór cú israelitas bunyibu pensary que Moisés ma diti sabiguet. Por ngú gochyibu Aarón: «¡Caquiinno toib ni guisanir nislóno. Buny toib dioxh par lóono!». Aarón cuapy layibu: «Coltané or ni napto». Ór cú Aarón goloʼ láani ló guii né bisaʼbu toib torlas de or. Ór cú buñ goniʼ: «¡Torlas reʼ nac dioxh xtunyno ni goleʼ lóono gudx Egipto!». Bunyibu xilanii torlascu né bienyibu láamu. ¿Mal ni bunyibu la? Scú, portín nírcu biduidyibu xtiitzyibu que nosi guienyibu Jehová. Per diti buny cumpliryibu xtiitzyibu.

Jehová bibiʼ guirá ni bunyibu né gochbu Moisés: «Bietj ronoʼ israelitas, portín diti  casobdiitzyibu naʼ. Cayenyibu toib dioxh falz». Moisés nimaca bietj né goynébu chop guiee tabla ni bunycuent Jehová láabu.

Órni Moisés bibigax ronoʼ guirá israelitas, bicadiagbu que guiráyibu cayoʼolyibu canción. Láaca bibiʼbu que cayaʼyibu né caxixipyibu nisló torlascu. Moisés nigolú bidzuitz né bisalbu guiropca guiee tablacu layoo né golaʼni. Órcuca bixoʼoxbu torlascu né gonabdiitzbu Aarón: «¿Ximod bikíil gudx reʼ looy par gonylo cós mal reʼ?». Aarón cuapy láabu: «Diti guidzuitzlo, looy rimbutzaaylo ximod nac gudx reʼ. ¡Gonabyibu toib dioxh, né bisala or ló guii né bireʼ torlas reʼ!». Aarón diti non ñonybu ngú. Moisés biaʼpybu laidy dainycu stoib né gonabbu Jehová natuidy xcalkié israelitas scásiʼ.

Jehová bituidybu scásiʼ xcalkié buñ ni ná nasob láabu. ¿Biduidylo cuent balaati gosac que israelitas nasobyibu Jehová né nasobyibu Moisés la?

«Órni guiduidylo xtiitzlo Dios, nimaca buny cumplir láani, portín láabu diti rioladxbu buñ ngaʼal. Órni guiduidylo xtiitzlo gonylo toib cós, buny cumplir láani» (Eclesiastés 5:4).