Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 27

Cualóyibu Jehová

Cualóyibu Jehová

Órni israelitas noʼsayibu ló yoovich, Coré, Datán, Abiram né 250 buñ cualóyibu Moisés. Goniʼyibu: «¡Ma bixacladxdo lóoto! ¿Xigony looypa non sanirlo nislódo? ¿Né xigony Aarón nac sumo sacerdote? Jehová diti nosi noʼ né lóoto, láaca noʼbu né lóodo». Jehová diti bioladx ni goniʼyibu. Portín órni goniʼyibu ngú diti nosi cualóyibu Moisés láaca cualóyibu Jehová.

Moisés gochbu Coré né guiráca buñ ni góc toibsi né láabu: «Guixí guidxinto ronoʼ tabernáculo né guitnéto ni ronyto goʼox lainy né colguistzaa incienso lainyni. Né ór cú Jehová saslooybu buñ ni ma golúbu».

Stoib dzúcu, Coré né 250 buñ ni góc toibsi né láabu gonyibu saʼyibu né Moisés ronoʼ tabernáculo. Lagarycu gosaló bisaʼijyibu incienso xomod rony toib sacerdote. Ór cú Jehová gochbu Moisés né Aarón: «Colguireʼ ronoʼ Coré né guirá buñ ni noʼ né layibu».

Coré gon saʼ né Moisés ronoʼ tabernáculo, per Datán, Abiram né xfamily diti gosaguel ñee. Jehová gochbu israelitas:  «Colguisagaʼ sit de ronoʼ yoʼ lairy xtuny Coré, Datán né Abiram». Israelitas nimaca bisobdiitzyibu. Datán, Abiram né xfamily gosagaʼyibu nisló yoʼ lairy xtunyibu. Tiptisi bixal Gudxlio né godaibyni buñ ni cualó Jehová. Né ronoʼ tabernáculo, bietj toib guii né bisaʼijni né bigaityni Coré né 250 buñ ni góc toibsi né láabu.

Después Jehová gochbu Moisés: «Góoch buñ ni rasanir nisló tigaaga family guitnéyibu xiacyibu. Bicaʼ laayibu laidy xiacyibu. Per laidy xiac xtuny xfamily Leví, bicaʼ laa Aarón. Goloʼ guiráni lainy tabernáculo. Né buñ ni guiaal xiac ngú ni golúya».

Stoib dzúcu Moisés goleʼ guirá xiacyibu né bislooybu láani guirá buñ ni gosanir nisló family. Xiac Aarón gopni guieʼ né dada cuá almendra guyaa loni. Modreʼ Jehová bislooytzay que ma golúbu Aarón gac sumo sacerdote.

«Colguisob ni rasanir ladto, né colguisob ná diti riento xigony» (Hebreos 13:17).