Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 20

Xhoop plagas más

Xhoop plagas más

Moisés né Aarón goyeeyibu nisló faraón né gochyibu faraón diitzreʼ: «Pal diti raduidylo lagary xcudxi guireʼ, soni que tzoʼ bionn lainy xcudxlo». Guirá bioncu goyoʼyimu lidx buñ egipcios, goyoʼyimu lidx buñ pobre né buñ ric. Ló guidopyca gudx Egipto goyoʼ bionn. Per gudx Gosén ro bibany israelitas diti goyoʼyimu. Bionn né stipnés plagas ni góc después nosi biabni ro goyoʼ egipcios. Faraón gochbu Moisés: «Gonab lóo Jehová cueʼ guirá bionn reʼ. Né orcúra sadudi lagary guireʼ xcudxlo». Ór cú Jehová goleʼbu bionn lainy gudx Egipto, per faraón diti biduidy lagary nareʼ israelitas. Xpensarylo, ¿goyoʼ xcalrrien faraón la?

Después Jehová goniʼ: «Pal faraón diti raduidy lagary guireʼ xcudxi, guirá nimal ni nap buñ egipcios saxoʼyimu né saityimu». Stoib dzúcu xinimal egipcios goity per ni toib xinimal buñ israelitas goity. Per ná scú faraón diti goloʼ cuent, né diti biduidybu lagary nareʼ gudx Israel.

Ór cú Jehová bixel Moisés ronoʼ faraón par nasalbu dée par guiaʼ. Déecu gocni goxioo né buroʼ goyné láani guirá lad né biabni laidy guirá egipcios. Láani bunyni que nalat gutz laidyibu né laidy guirá xinimalyibu. Ná scú faraón diti gosaguel nareʼyibu.

Jehová bixelbu Moisés ronoʼ faraón stoib, né gochbu faraón ndeʼ: «Pal diti nálo guislaʼlo xcudxi,  guixí soni que guiab toib guié laver». Stoib dzúcu Jehová buny que goniʼ guisioʼo, biapynís né góc guié laver. Nigolú nadzuʼpy gocni, portín ló dzúcu buñ egipcios diti ma bibiʼyibu toib guié declascu. Binitlóni guirá yac rop né guirá ni noʼ ló layoo, per diti noʼ xi bunyni a guirá israelitas. Faraón goniʼ: «¡Gonab lóo Jehová guiscueʼsbu guié laver reʼ! Ór cú lóoto labúu guireʼto». Per órni golésni, faraón ma diti biduidy lagary nareʼyibu.

Ór cú Moisés góoch láabu: «Soni que tzoʼ gozóo né layimu sooyimu guirá ni bisian guié laver». Xidalguixo gozóo godó guiráxadit ni biaʼan ló layoo né godóyimu xquix yac. Faraón gochbu Moisés: «Gonab lóo Jehová cueʼbu guirá gozóo ni noʼ reʼ». Per después ni Jehová goleʼ layimu, faraón góc nayaʼ né diti biduidy lagary nareʼ israelitas.

Jehová gochbu Moisés: «Goliskiaʼ ñalo». Órcuca gosaló góc nacayasquin. Ló tzón govitz buñ egipcios diti labúu bibiʼyibu saʼyibu. Per ro golés israelitas diti góc nacay.

Faraón gochbu Moisés: «Looy né xcudxlo labúu guireʼto per colguisian guirá xinimalto». Moisés cuapy láabu: «Non tzanédo xinimaldo par guiscaddo láamu Dios xtunydo». Faraón bidzuitzbu né gonidiébu: «¡Bireʼ nislóya! Pal guibiʼya looy stoib, sagati looy».

«Lóoto sabiʼto ximod diti toibsi midid nac toib buñ ni rony xinésni né toib buñ mal, diti toibsi midid nac toib buñ ni rien Dios né toib ni diti rien láabu» (Malaquías 3:18).