Buñ israelitas goyoʼ ló xomandary buñ egipcios né layibu buny mandaryibu israelitas ñony dxiin nanaa. Jehová bixelbu Moisés né Aarón nigudxyibu faraón: «Biduidy lagary guireʼ xcudxi né guienyibu naʼ ló yoovich». Faraón gócbu buñ farmay né goniʼbu: «Xí ronyportar naʼ ni ná Jehová. Diti saslaʼya israelitas». Después faraón buny mandarybu israelitas ñony más dxiin nadip. Por ngú Jehová goloʼ xcalrrien faraón. ¿Ximod bunybu láani? Bisalbu chii plagas loguiaʼ Egipto. Jehová gochbu Moisés: «Faraón diti ragoʼ cuent ni raabi. Per guixisil sieebu roʼ guʼuc Nilo. Por ngú goyee né góoch láabu que xinís guʼuc Nilo sácni runy portín diti raduidybu lagary guireʼ xcudxi». Moisés bisobdiitz né goyeebu ronoʼ faraón. Faraón bibiʼbu órni Aarón bicaʼ xiac ló xinís Nilo né xinísni gocni runy. Guʼuc reʼ gosaló bilanikni né diti labúu goʼyibu xinísni, né beel ni goyoʼ lainy guʼuc cú goity. Per ná scú faraón diti biduidybu lagary nareʼ israelitas.

 Ló gatz govitz después, Jehová bixelbu Moisés ñee ronoʼ faraón stoib né ñaibybu faraón: «Pal diti raduidylo lagary guireʼ xcudxi, guidopynac lainy gudx Egipto sadzani de mbuuch». Faraón diti goloʼ cuent ni goniʼ Moisés por ngú Aarón goliskiaʼ xiac né guidopyca lainy gudx Egipto goyoʼ mbuuch. Goyoʼ mbuuch lidx guirá buñ, ló xiloʼonyibu láaca ló xcalrroyibu. ¡Goyoʼyimu guirá lad! Ór cú faraón gochbu Moisés: «Gonab lóo Jehová cueʼbu guirá mbuuch ni noʼ reʼ. Después, naʼ sadudi lagary guireʼ xcudxbu». Jehová buny que ñaity guirá mbuuchcu né buñ egipcios bicuaʼ montón layimu. Ló guidopynac gudxcú bilanik, per faraón diti biduidybu lagary nareʼ israelitas.

Después, Jehová gochbu Moisés ñaibybu Aarón: «Godin xiaclo layoo. Órni gonylo láani, goxioo sácni malatz». Né scú gocni, guirá lad gotz malatz né gosaló godómu buñ. Tipnés buñ egipcios gochbu faraón: «¡Dios cayony guirá ndeʼ!». Per ná scú, faraón diti biduidybu lagary nareʼ israelitas.

«Ló dzúcu soni que guimbuyibu xcalnadipa né xcalmandari, né sanyibu que laaya ngú Jehová» (Jeremías 16:21).