Lainy gudx Cesarea golés toib soldad ni góc laa Cornelio, láabu gosanirbu nisló xidalguixo soldad romanos. Ná diti gócbu judío, buñ judíos gop respet láabu. Cornelio gócbu toib buñtzay portín nigolú gocnébu buñ ni godudy ló govinn. Toibtica dzú, toib ángel xtuny Jehová goyee ronoʼbu né góoch láabu: «Dios ma bicadiag ni gonablo láabu. Bixel tipnés buñ tzee gudx Jope, ronoʼ Pedro, né gaibyibu Pedro guieed ronoʼlo». Cornelio bixelbu tzón buñ goyee gudx Jope, gudxcú biaʼan midid 50 kilómetros (30 millas) niis lad sur.

Laʼga cayac guirá ngú, lainy gudx Jope, Pedro gop toib visión. Bibiʼbu tipnés nimal ni buñ judíos diti godó portín nacyimu nimal buidy. Láaca bicadiagbu toib rudx ni goniʼ que ñoobu nimal reʼ. Pedro diti ná ñoo né goniʼbu: «Dipa ma godóya nimal buidy». Rudxcu cuapy láabu: «Diti guiniʼlo que buidy guirá nimal reʼ, portín Dios ná que nigoreʼ ma nayaamu». Rudxcu láaca góoch láabu: «Sagaʼ tzón buñ roʼ xpuertlo, goyee né layibu». Pedro goyee roʼ puert né gonabdiitzbu buñcu xigony noʼyibu cú. Layibu cuapyibu: «Cornelio toib buñ ni rasanir nisló xidalguixo soldad romanos  bixel lóodo. Gochbu lóodo tzeelo lidxbu ni noʼ gudx Cesarea». Pedro biruʼ biinreʼ par ñaʼan lidxbu gueʼelcu. Stoib dzúcu Pedro né biinreʼ goyeeyibu Cesarea. Tipnés herman de gudx Jope láaca goyee né layibu.

Órni Cornelio bibiʼbu Pedro, bixixipbu nisló Pedro. Per Pedro góoch láabu: «Diti guixixiplo nislóya. Portín naca toib buñgudxlio xomodca looy. Dios góoch naʼ ñeela lidxlo, ná lóodo ni nacdo buñ judíos diti rioʼdo lidx buñ ni diti nac judíos. Per nigoreʼ góoch naʼ, ¿xigony bixelcaʼlo naʼ?».

Cornelio gochbu Pedro: «Ma godudy midid tap govitz de goló gonaba lóo Dios, né toib ángel góoch naʼ naxelcaʼya looy. Nigoreʼ ranába looy, bisuidy lóodo de Jehová». Pedro cuapy: «Nigoreʼ nantzaya que Dios diti rabúbu buñ, láabu racacuentbu nitisi buñ ni ná guieen láabu». Pedro bisuidy layibu xidal cós de Jesús. Cornelio né guirá buñ ni goyoʼ lidxbu cuaʼyibu espíritu santo né goyonisyibu.

«Dios racacuentbu buñ ni radzuiby láabu né rony xinésni. Nac nitisi nac xcudxyibu» (Hechos 10:35).