Rabiguet

Goyee ro ná índice xtuny contenidos

 LESIONY 99

Toib buñ ni gon lachquiip goyonis

Toib buñ ni gon lachquiip goyonis

Lainy gudx Filipos bibany toib mbioxhlas gonaʼ, gócbu toib criat né labúu gonbu xí gac ló dzú ni sietra portín goyoʼ Buñdzab laidybu. Por ngú labúu bidxinaʼbu xiroʼ bidxiich par xpixuanbu. Órni bidxin Pablo né Silas gudx Filipos, buñgonaʼcu cuanal layibu por xidal govitz guirá lagary ro goyeeyibu. Demony ni goyoʼ laidybu buny que nacaʼbu rudx scareʼ: «Buñreʼ nacyibu xomós Dios ni noʼ más Guiaʼ». Pablo bixacladx né gochbu demonycu: «¡Ló laa Jesús rony mandary looy, bireʼ laidybu!». Né demonycu bireʼ laidy mbioxhlascu.

Órni xpixuan mbioxhlascu biduidyibu cuent que ma diti labúu nadxinaʼbu bidxiich, bidzuitzgoluʼyibu. Bisobioyibu Pablo né Silas né goynéyibu biinreʼ nisló buñchiin né goniʼyibu: «¡Chop buñreʼ diti rasob ni ná ley, né cagoʼyibu diitz buñ!». Buñchiin bixelyibu buñ ñonynaa Pablo né Silas né después goloʼyibu chop biincu lachquiip. Buñ ni gon lachquiip goloʼ layibu lainy toib cuart ni goyoʼ dada xanioʼ ni más nacayasquin. Bilipyibu Pablo lad tipnés tablas.

Pablo né Silas gosaló bíilyibu canción par bunyxiroʼyibu Jehová né stipnés buñ ni goyoʼ lachquiip bicadiag layibu. Tisintiempsi, galaʼ gueʼel godudy toib xo rodann. Bixalni xpuert lachquiip né caden ni bilipyibu ña né ñeʼ Pablo né Silas bixachni laidy tablas ro bilipyibu láani. Buñ ni gon lachquiip bixonybu goyoʼbu ro nayeg Pablo né Silas, né órni bibiʼbu que xobial puert, bunybu pensary que ma yadi chop biincu, por ngú goleʼbu espad xtunybu né nábu nagaitybu láacabu.

Ór cú Pablo bicaʼ rudx né goniʼbu: «¡Diti guigaitylo looy! ¡Guirádo noʼdo reʼ!». Buñcu bixony né bixixipbu nisló Pablo né Silas. Né gonabdiitzbu: «¿Xí goni par labúu guilaaya?». Layibu cuapyibu: «Looy né guirá xfamilylo gonyto crer lóo Jesús». Ór cú Pablo né Silas bisuidy láabu ni ná xtiitz Jehová, né buñ ni gon lachquiip né guirá xfamilybu goyonisyibu.

«Sanásyibu lóoto né sioʼ ni sacaló lóoto. Sonycuentyibu lóoto sinagogas né sagoʼyibu lóoto press. Né por laaya sieeto nisló reyes né nisló buñchiin. Guirá ndeʼ sácni par gan buñ de naʼ» (Lucas 21:12, 13).