Rabiguet

Goyee ro ná índice xtuny contenidos

 LESIONY 89

Pedro goniʼ que diti rimbubu Jesús

Pedro goniʼ que diti rimbubu Jesús

Laʼga Jesús né xpiin noʼsayibu lainy yoʼ ro bunyibu Pascua, goniʼbu diitzreʼ: «Guirácato sasianto naʼ gueʼel reʼ». Pedro goniʼ: «Naʼ yaca. Ná stipnés guisian looy, naʼ dipa sasiana looy». Per Jesús gochbu Pedro: «Órni toib guitngol cudx, looy ma tzón buelt goniʼlo que diti rimbulo naʼ».

Órni soldad goynéyibu Jesús lidx Caifás, xidal xpiimbu bixony. Per chopyibu goyoʼ lad guirá buñcu, toibtica de layibu góc Pedro. Goyoʼbu lidx Caifás né bibigbu ro goloʼ buñ guii par ñoxidzaʼyibu. Guiicu bisaníni ló Pedro né toib buñgonaʼ bibiʼ láabu né gonaʼcu goniʼ: «¡Rimbuya looy! ¡Looy gosanélo Jesús!».

Pedro cuapy: «Yaca. Diti nigolú ni nálo né diti naana de xí caniʼlo». Ór cú goyeebu niis roʼ puert né stoib buñgonaʼ bibiʼ láabu né gonaʼcu gochbu tipnés ni dxee cú: «¡Buñguieeuca, gosanébu Jesús!». Pedro cuapy: «¡Naʼ diti rimbuya Jesús!». Láaca stoib buñguieeu góoch láabu: «Looy naclo toibtica de layibu. Riendxichni portín raniʼlo xomod buñ galileo, xomodca Jesús». Per Pedro goniʼ: «¡Diti rimbuya láabu!».

Órcuca gorudx toib guitngol. Pedro bibiʼ que Jesús cabiʼ láabu né bisetnaladxbu ni góoch Jesús láabu. Ór cú bireʼbu né gorudxaʼdotbu.

Laʼga góc guirá ngú, Sanedrín bidopyibu lidx Caifás par ganyibu xi gonyibu né Jesús. Sanedrín gocni toib tribunal xtuny buñ judíos. Layibu ma goloʼyibu guicyibu guigaityibu Jesús né biyopyibu xi razón ñoʼ par labúu ñonyibu láani. Per diti bidzelyibu ximod nagotzyibu falz Jesús. Caifás gonabdiitzbu Jesús: «¿Xiin Dios looy la?». Jesús cuapy: «Scú, naʼ naca xiin Dios». Ór cú Caifás goniʼ: «Xí más cabésno. ¡Ma goniʼbu mal de Dios!». Guiráyibu gocyibu toibsi né goniʼyibu: «Buñguieeu reʼ non gaity». Godapyibu lóo Jesús, bichixunyibu lóo Jesús, bilipyibu tlaʼ lairy  lóbu né godinyibu Jesús maca goniʼyibu: «¡Pal naclo toib profeta, góoch lóodo! ¿Chú láabu godin looy?».

Órni birá gueʼel, goynéyibu Jesús ronoʼ Sanedrín né gonabdiitzyibu Jesús stoib: «¿Xiin Dios looy la?». Jesús cuapy layibu: «Scú. Lóocato caniʼto que naca xiin Dios». Ór cú goniʼyibu que Jesús caniʼ mal de Dios né goynéyibu Jesús ronoʼ palacio xtuny Poncio Pilato. ¿Xí góc después? Guibiʼno láani.

«Sadxin ór [...] ro guirácato saretzlasto né sieeto lidxto, né sasianto naʼ tobi. Per diti noʼya tobi, portín Bixiosa noʼ né naʼ» (Juan 16:32).