Rabiguet

Goyee ro ná índice xtuny contenidos

 LESIONY 91

Jesús biás lad gueʼet

Jesús biás lad gueʼet

Después ni goity Jesús, toib buñguieeu ric ni góc laa José goleʼbu permís ló Pilato par nalitbu Jesús ló yac nadopcu. José bichelbu Jesús né lairy de lino ni rasac né goloʼbu nisralanax laidy Jesús né bicachbu Jesús lainy toib baʼ copy. Bixelbu tipnés buñ nasieg roʼ baʼcu né toib guiee xiroʼ. Sacerdotes gochyibu Pilato: «Radzuibydo tzee xpiin Jesús, né cueʼ láabu lainy baʼ né guiniʼyibu que ma biás Jesús lad gueʼet». Por ngú Pilato góoch layibu: «Colguisiegdxich roʼni né colguixel tipnés buñ gan roʼ baʼcu».

Ló tzón govitz, tipnés buñgonaʼ goyeeyibu roʼ xpaʼ Jesús rosildiguieʼ. Órni bidxinyibu cú bibiʼyibu que goyoʼ ni bixal baʼcu. Lainy baʼcu goyoʼ toib ángel, ni goniʼ: «Diti guidzuibyto, Jesús ma biás. Colgaiby xpiimbu tzee Galilea né cú sanyibu Jesús».

María Magdalena gooygudxcabu Pedro né Juan. Né gochbu biinreʼ: «Noʼ ni golann a Jesús lainy baʼ». Pedro né Juan bixonyibu goyeeyibu roʼ baʼ. Órni bibiʼyibu que ma nadach baʼcu, bibiguetyibu lidxyibu.

Después María bibiguetbu roʼ baʼ stoib. Lainy baʼcu bibiʼbu chop ángeles né gochbu ángelescu: «Diti naana pu sanéyibu Señor xtuni». Ór cú bibiʼbu toib buñguieeu, né bunybu pensary que buñcu cayan lagarycu. María góoch láabu: «Señor ranabba lólo, góoch naʼ, ¿pu goysanlo láabu?». Órni buñcu cuapy: «¡María!». Láabu biduidycabu cuent que buñguieeucu nac Jesús. María goniʼ: «¡Mextra!», né gonáscabu Jesús né Jesús gochbu María: «Gooygudx xpiina que ma bibiʼlo naʼ». Órcuca María bixony né gooygudxca láani xpiin Jesús.

Dzúcuca, per más godzu chop xpiin Jesús bireʼ Jerusalén né seeyibu Emaús. Ló néz, toib buñ bidxin ronoʼyibu né gosaa toibsi né layibu. Buñcu gonabdiitz xí láani caniʼyibu. Layibu cuapyibu: «¿Xí diti nanlo la? Ma godudy tzón govitz de goló sacerdotes buny mandaryibu ñaity Jesús. Nigoreʼ tipnés buñgonaʼ caniʼ que Jesús nabany». Buñguieeucu gonabdiitz layibu: «¿Xí diti ronyto crer ni  goniʼ profetas la? Layibu goniʼyibu que Cristo non ñaity né ñásbu stoib». Né goniʼbu más cós ni sieed ló Escrituras. Órni bidxinyibu Emaús, chop biinreʼ gochbu buñcu ñaʼan né layibu. Órni ma cayoxtzuyibu buñcu biduidy guixquix Dios por páa ni guáyibu, ór cú xpiimbu biduidy cuent que nacbu Jesús. Né Jesús binitca.

Guiropca biinreʼ bixonyibu bibiguetyibu Jerusalén. Bidxinyibu lainy toib yoʼ ro bidop stipnés xpiin Jesús né goniʼyibu guirá ni gosacloyibu. Laʼga noʼyibu lanioʼ, bidxin Jesús ronoʼyibu. Primer, xpiimbu diti buny crer pal nigolúpa Jesús láabu. Per Jesús góoch layibu: «Colguibiʼ ñaya, né colcan naʼ. Portín ma caani que Cristo siás lad gueʼet».

«Naʼ ngú néz né ni nigolú né vida. Ni toib rieed ronoʼ Bixiosa sino por naʼ» (Juan 14:6).