Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 77

Jesús goniné toib buñgonaʼ roʼ pós

Jesús goniné toib buñgonaʼ roʼ pós

Diti xidzú de goló bilox Pascua Jesús né xpiin bibiguetyibu Galilea. Godudyibu niis Samaria né bisaladxyibu toib lagary ni góc laa pós xtuny Jacob ni goyoʼ gahxca gudx Sicar. Jesús bisaladxbu cú laʼga xpiimbu goysiʼ galrro lainy gudxcú.

Toib buñgonaʼ bieedcaʼ nís roʼ póscu, né Jesús góoch láabu: «Biduidy nís gueeya». Láabu gonabdiitzbu: «¿Xigony caninélo naʼ, janlo naʼ naca buñ samaritana la? Portín buñ judíos diti radzakyibu né buñ samaritanos». Per Jesús goniʼ: «Pal ñanlo chú caniné looy, nanablo nís naʼ, né naʼ nadudi nís de galnabany looy». Buñgonaʼcu gonabdiitz: «¿Ximod guiduidylo nís naʼ? Ñac naplo ni guiquiinlo par cueʼlo nís». Jesús cuapy: «Ni gueʼ nís ni naʼ cadudi dipa salaʼnbu nís stoib». Buñgonaʼcu góoch láabu: «Señor, biduidy nís cú naʼ».

Después Jesús góoch láabu: «Góoch tzeʼel lo guieed». Láabu cuapybu: «Diti noʼ tzeʼel la». Jesús goniʼ: «Nigolú ni nálo, portín ma bunylo galtzeʼel gáay buelt né nigoreʼ rabesnélo toib buñguieeu ni diti nac tzeʼel lo». Buñgonaʼcu cuapy: «Toib profeta looy. Buñ xcudxi ná que labúu guiendo Dios laidy dainy reʼ, per buñ judíos ná que nosi lainy gudx Jerusalén labúu guiendo Dios. Naʼ raabi que órni guidxin Mesías láabu saibybu lóodo ximodpa guiendo Dios». Ór cú Jesús góoch láabu toib cós ni diti ma gochbu a ni toib buñ: «Naʼ ngú Mesías».

 Buñgonaʼcu bixony goyee gooygudxbu buñ samaritanos: «Sigory ma bidzela Mesías. Nanbu guirá ni ma buni. Coltaʼ né colguibiʼ láabu». Ór cú buñ goyee né láabu roʼ pós né bicadiagyibu guirá ni bisuidy Jesús layibu.

Ór cú buñ samaritanos gonabyibu Jesús ñaʼan né layibu. Jesús biaʼan chop govitz lainy gudxcú né bisuidybu xidal cós buñcu, xidalyibu gop fe lóo Jesús. Después gochyibu buñgonaʼcu: «Nigoreʼ ni ma bicadiagdo láabu, nandxichdo que láabu ngú ni guilaa buñgudxlio».

«¡Goda! né nitisi ni guicadiag, guiniʼ ¡goda!, né nitisi ni calaʼn nís, ¡guieed!; né nitisi ni ná guieed gueʼ nís de galnabany scásiʼ» (Apocalipsis 22:17).