Rabiguet

Goyee ro ná índice xtuny contenidos

 LESIONY 78

Jesús goniʼbu de Gobierno xtuny Dios

Jesús goniʼbu de Gobierno xtuny Dios

Diti xidzú de goló goyonis Jesús, gosalócabu goniʼbu: «Gobierno xtuny Dios ma noʼni gahx». Xpiimbu goyee né láabu lainy gudx Galilea né gudx Judea. Órni Jesús bibiguet xcudx ni góc laa Nazaret, goyeebu lainy sinagoga né bixalbu rollo xtuny Isaías né bíilbu láani fuers: «Jehová biduidy espíritu santo naʼ par guiniya diitz sacró». ¿Xí biduidybu diitz? Bay, buñ ná nabiʼ ñonybu galrradziguiaʼ. Per láabu diti cuaʼbu espíritu santo par gonybu ngú, láabu cuaʼbu láani par gonybu toib dxiin ni más rasac, láani ngú guiniʼbu diitz sacró de Gobierno xtuny Dios. Órni bilox bíilbu láani gochbu buñ ni bicadiag láabu: «Dzureʼ cayac cumplir profecía reʼ».

Después, Jesús goyee roʼ nisdaʼ ni noʼ Galilea. Cú bibiʼbu tap buñ ni canás beel né gochbu tap buñcu: «Colguicanal naʼ, né ma diti guinásto beel xalagary ngú ma guiyopyno buñ». Tap buñreʼ góc laa Pedro, Andrés, Santiago né Juan. Órcuca bisianyibu xchiinyibu né cuanalyibu Jesús. Gosaayibu lainy guidopyca gudx Galilea goniʼyibu de Gobierno xtuny Jehová. Goninéyibu buñ lainy sinagogas, lainy mercad né locay. Xidal buñ cuanalyibu Jesús guirá ro goyeebu. Xidal buñ gon de Jesús dada buñ ni bibany nigolú sit xomod gudx Siria.

Godudy dzú, Jesús biduidy galnadip a tipnés xpiin par labúu nasialyibu buñ né par labúu nabeʼyibu demony laidy buñ. Stipnés buny compañer Jesús par goniʼyibu xtiitz Dios lainy gudxrop né lainy ranch. Láaca tipnés buñgonaʼ ni dipa bisian a Jehová goyoʼ ladyibu. Tipnés buñgonaʼ ni gosaa né layibu góc laa María Magdalena, Juana, Susana né stipnés, guirá buñgonaʼ reʼ gocné a Jesús né a xpiin.

Después ni bisuidybu guirá xpiimbu ximod guiniʼyibu xtiitz Dios, bixelbu xpiimbu gony láani. Órni gosaayibu niis Galilea, xidal buñ góc xpiin Jesús né goyonisyibu. Goyoʼ xidal buñ ni ná ñac xpiimbu, por ngú láabu goniʼbu que Gudxlio reʼ nacni xomod toib layoo ni ma noʼ puext par gony buñ cosech loni. Láabu goniʼbu: «Colguinab lóo Jehová par guixelbu más buñ gony cosech».  Después golúbu 70 ni gac xpiimbu né bixelbu 70 cú de chop en chop par guiniʼyibu xtiitz Dios lainy guidopy gudx Judea. Guiránac buñ gochyibu de Gobiernocu. Órni bibiguetyibu, gochyibu Jesús ximod goyeeni layibu. Diti labúu buny Buñdzab xitcal par nacaa ló dxiinreʼ.

Jesús bisuidytzaybu xpiimbu par ñonyibu dxiin después ni láabu nabiguetbu guibá. Láabu gochbu xpiimbu: «Colguiniʼ diitz sacró de Gobierno reʼ ló guidopynac Gudxlio. Colguisuidy xtiitz Dios guirá buñ né colconis layibu».

«Láaca non guiniya de diitz sacró de Gobierno xtuny Dios ló stipnés gudx, portín por ngú Dios bixel naʼ» (Lucas 4:43).