Rabiguet

Goyee ro ná índice xtuny contenidos

 LESIONY 83

Jesús biyaʼan xidal mil buñ

Jesús biyaʼan xidal mil buñ

Órni ma cayatz chop tzón govitzsi par guidxin dzú ni gonyibu lanii Pascua ló íz 32, xpiin Jesús bibiguet ro gooyniʼ xtiitz Dios. Jesús biaʼpy né layibu lainy toib bark né goyeeyibu Betsaida par guisaladxyibu portín ma cadzagyibu. Per órni bixinyibu roʼ nisdaʼ, Jesús bibiʼ xidalguixo buñ ni goynal layibu cú. Láabu nábu nasaladxbu né xpiimbu, per ná scú cuacuentbu guirá buñcu. Bisialbu buñguitz né bisuidybu xidal cós buñ. Guidopynac dzúcu bisuidybu buñ de Gobierno xtuny Dios. Órni ma cadzelio, xpiimbu góoch láabu: «Guirá buñreʼ ma calaʼn. Góoch layibu ma guieeyibu par guiyopyibu ni guáyibu».

Per Jesús goniʼ: «Diti saxela layibu guieeyibu scásiʼ. Lóoto colguiduidy ni guáyibu». Xpiimbu gonabdiitz: «¿Tzasiido páa guáyibu la?». Toib xpiimbu ni góc laa Felipe goniʼ: «Ná ñapno xiroʼ bidxiich, diti labúu nasiino páa par labúu nayaʼano guirá buñreʼ».

Jesús gonabdiitz xpiin: «¿Napno xiroʼ galrro la?». Andrés cuapy: «Napno gáay páa né chop beel. Per diti sigaʼlni par guá guirá buñreʼ». Jesús goniʼ: «Coltané páa né beel ni napno». Después, gochbu buñ nabú ló guixbataʼ né naguaʼyibu por montón de 50 né 100. Ór cú cuaʼbu páa né beelcu, golísbu lóbu né gonabbu lóo Dios. De ngú biduidybu páa né beel xpiimbu né layibu bitzoyibu láani cuaʼ buñ. Dzúcu biyaʼanbu 5.000 buñguieeu, láaca godó buñgonaʼ né mbiox né guiráyibu bidzatip lainyibu. Órni  bilox godóyibu, xpiin Jesús bitop galrro ni biaʼan par diti nasapyibu láani. ¡Bitopyibu 12 dzoim! ¿Toib galrradziguiaʼ buny Jesús ja?

Guirá buñ nigolú bidziguiaʼ ni bunybu né por ngú goniiny layibu que Jesús ñac rey xtunyibu. Per Jehová diti goniiny láabu que Jesús ñac rey portín yása guidxin dzú par ñonybu dxiincu, né Jesús gon láani. Ór cú gochbu buñ nabiguet lidx né bixelbu xpiimbu ñee stoib lad nisdaʼ de Galilea. Layibu biaʼpyibu lainy bark né Jesús biaʼpy laidy toib dainy toibbu. ¿Xigony? Portín nábu ñoʼbu toibbu par naninébu Bixiosbu. Jesús guirá ór goleʼ tiemp par goninébu Bixiosbu ná nigolú goyoʼ xchiimbu.

«Diti gonyto dxiin por galrro ni raxin, xalagary ngú colgony dxiin por galrro ni diti raxin ni raduidy galnabany tipzó, Xiin buñgudxlio saduidy láani lóoto» (Juan 6:27).