Rabiguet

Goyee ro ná índice xtuny contenidos

 LESIONY 85

Jesús bisial buñ dzú sábda

Jesús bisial buñ dzú sábda

Fariseos nigolú bianladxyibu Jesús né biyopyibu mod nagaityibu Jesús. Goniʼyibu que Jesús diti non nasialbu buñ ló dzú sábda. Toib dzú sábda, Jesús bibiʼ toib buñdxep ni canab bidxiich locay. Ór cú gochbu xpiimbu: «Colguibiʼ ximod xcalnadip Dios sasialni buñreʼ». Ór cú Jesús bichixuny né bunybu tidxó been. Después bigasbu láani ló buñcu né goniʼbu: «Goyee né godip lólo lainy tank ni noʼ Siloam». Buñcu buny ni góoch Jesús láabu né órcuca bibiʼbu por primerdiguieʼ buelt. Portín golbu lochep.

Buñ bidziguiaʼ né goniʼ: «¿Ndeʼ nac buñ ni gurú locay né gonab bidxiich ja? ¿O yaca la?». Buñcu cuapy: «Naʼ ndeʼ, naʼ goola lochep». Buñ gonabdiitz láabu: «¿Né xigony ma labúu rabiʼlo?». Láabu goniʼbu ximod bialbu, ór cú goynéyibu buñguieeu reʼ par naninébu fariseos.

Láabu gochbu fariseos: «Jesús bigas been lóoya, né gochbu naʼ naguiba láani. Buni ni gochbu naʼ, né nigoreʼ ma labúu rabiʼya». Guirá fariseos goniʼ: «Pal Jesús rasialbu buñ ló dzú sábda, diti ronybu láani né xcalnadip Dios». Per stipnés buñ goniʼ: «¿Ximod labúu rasialbu buñguitz pal diti napbu xcalnadip Dios?».

Fariseos bixelcaʼyibu bixios buñguieeucu né gonabdiitzyibu: «¿Ximod bial bisaló xiinlo?». Bixiosbu né xinaʼbu bidzuibyibu portín fariseos ma goniʼ que  sabeʼyibu lainy sinagoga buñ ni gap fe lóo Jesús. Por ngú nosi goniʼyibu: «Diti nando. Colguinabdiitz láabu». Fariseos gonabdiitz más cós buñguieeucu, né láabu goniʼbu: «Ma goodxi lóoto ximod biala. ¿Xigony canabdiitzsato naʼ?». Fariseos bidzuitz né bilaʼk láabu.

Después Jesús goyguenbu buñguieeucu né gonabdiitzbu: «¿Naplo fe lóo Mesías la?». Buñguieeucu cuapy láabu: «Pal ñaana chú láabu, ñapa fe lóbu». Jesús góoch láabu: «Naʼ ngú Mesías». ¿Nigolú natzaay góc Jesús né buñguieeucu ja? Scú, diti nosi bisialbu buñguieeucu láaca gocnébu buñguieeucu gap fe.

«Lóoto cachéto, portín diti rimbuto ni ná Escrituras ni xcalnadip Dios» (Mateo 22:29).