Rabiguet

Goyee ro ná índice xtuny contenidos

 LESIONY 74

Jesús bidxin góc Mesías

Jesús bidxin góc Mesías

Juan gosaa goniʼ diitzreʼ: «Mápa mer guidxin toib ni más nadip que naʼ». Órni Jesús gop midid 30 íz, bireʼbu Galilea né goyeebu guʼuc Jordán ro cagonis Juan buñ. Jesús goniiny que Juan nagonis láabu per Juan goniʼ: «Diti naʼ non conis looy. Looy non conislo naʼ». Jesús cuapy láabu: «Jehová ná que looy conislo naʼ». Ór cú goyoʼyibu lainy nís né Juan goloʼ guidopyzobu lainy nís.

Después ni Jesús bireʼ lainy nís, goninébu Jehová. Órcuca bixal guibá né espíritu xtuny Dios bietj xomod palom ronoʼbu. Ór cú Jehová goniʼ desde lainy guibá: «Looy naclo Xiinna ni ronladxi. Naʼ ma cuacuent looy».

Órni Jesús cuaʼ espíritu xtuny Jehová, dzúcu bidxinbu gócbu Cristo o Mesías. Ór cú gosaló bunybu dxiin ni Jehová bixel láabu gonybu ló Gudxlio.

Después ni goyonis Jesús, goyeebu ló yoovich né goyoʼbu cú 40 dzú. Órni bibiguetbu goyeebu ronoʼ Juan. Órni bibiʼ Juan láabu, Juan goniʼ: «Ndeʼ nac Xilieen xtuny Dios ni cueʼ xcalkié buñgudxlio». Goniʼbu ngú par que buñ naduidy cuent que Jesús nac Mesías. ¿Nanlo xi gosaclóo Jesús órni goyoʼbu ló yoovich la? Guibiʼno láani.

«Láaca goyoʼ toib ni goniʼ desde lainy guibá ni ná: Looy naclo Xiinna, ni nadxiʼya, ni naʼ ma cuacuenta» (Marcos 1:11).