Rabiguet

Goyee ro ná índice xtuny contenidos

 LESIONY 80

Jesús golú 12 apóstoles

Jesús golú 12 apóstoles

Órni Jesús ma sanébu midid tobiz gorol ni caniʼbu xtiitz Dios, goloʼbu guicbu gonybu toib dxiin ni nigolú rasac. ¿Chú nabúbu par ñony dxiin né láabu né nasanir nisló congregación cristiana? Antes de nabúbu xpiimbu, gonabbu xcalrracné Jehová. Goyeebu laidy toib dainy né goninébu Jehová guidopynac gueʼelcu toibbu. Stoib dzúcu Jesús bitop tipnés buñ ni cuanal láabu né lad guirá biinreʼ golúbu 12 buñ ni bidxin góc apóstoles xtunybu. ¿Nanlo ximod góc laayibu la? Góc laayibu Pedro, Andrés, Santiago, Juan, Felipe, Bartolomé, Tomás, Mateo, Santiago xiin Alfeo, Tadeo, Simón né Judas Iscariote.

Andrés, Pedro, Felipe, Santiago

Guiráca 12 cú goyeeyibu né Jesús guirá lad. Jesús bisuidy layibu ximod guiniʼyibu xtiitz Dios né después bixelbu ma nosi xpiimbu. Jehová láaca biduidy galnadip layibu par nabeʼyibu demony laidy buñ né nasialyibu buñguitz.

Juan, Mateo, Bartolomé, Tomás

Jesús bibiʼbu xpiimbu xomod ximigbu né gopbu confianz biinreʼ. Xpiin Jesús diti goyeeyibu scuel xirop por ngú fariseos  bunyibu pensary que guirá biinreʼ diti nan xitcal. Per Jesús diti bibiʼ layibu scú. Bisuidytzaybu xpiimbu par ñonyibu dxiinreʼ galán. Layibu non ñoʼyibu né Jesús ló dzú ni más naquiin Jesús galrracné. Layibu non ñoʼyibu né Jesús dzú ni ñaitybu né órni ñásbu lad gueʼet. Xidal de layibu gocyibu de Galilea, xomodca Jesús. Né tipnésyibu goyoʼ tzeʼel.

Santiago xiin Alfeo, Judas Iscariote, Tadeo, Simón

Xpiimbu góc buñ galkié por ngú bichéyibu. Goyoʼ ór cuenunysi goniʼyibu o cuenunysi bunyibu. Diti gopyibu paseinys. Dada gonidalyibu par ñanyibu chú más rasac ladyibu. Per guiráyibu gocyibu buñtzay né gondxiʼyibu Jehová. Layibu gocyibu tipnés buñ ni gosanir nisló congregación cristiana órni Jesús ma diti ñoʼ ló Gudxlio.

«Naʼ rabiʼya lóoto xomod ximiga, portín guirá cós ni bicadiaga de Bixiosa ma goodxi láani lóoto» (Juan 15:15).