Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 81

Discurs ni goloʼ Jesús laidy dainy

Discurs ni goloʼ Jesús laidy dainy

Después ni golú Jesús 12 apóstoles bietjbu laidy dainycu né goyeebu toib lagary ro biguaʼ xidal buñ. Guirá buñ ni bidxin cú bieedyibu de Galilea, Judea, Tiro, Sidón, Siria né de stiplad guʼuc Jordán. Bitnéyibu buñguitz, buñ ni cadudy ló galrrioʼob xtol demony né Jesús bisial guirá buñcu. Ór cú gorúbu laidy dainy né gosaló bisuidybu buñ. Golexabu xi non gonyno pal nainy lóono gacno ximig Dios. Láaca golexabu que non guiduidyno cuent que raquiinno xcalrracné Jehová né non guisuidyno gonladxno láabu. Diti labúu gonladxno Dios pal diti ronladxno buñ. Non gacno buñtzay né gonyno xinésni né stipnés buñ, dada né buñ ni nac xi enemigno.

Jesús goniʼ: «Diti nosi gonladxlo ximiglo, láaca non gonladxlo xi enemiglo né guituidylo xcalkiéyibu scásiʼ né guidopy xcalnabanylo. Né pal noʼ ni radzuitz né looy, nimaca goyee né  góoch láabu guituidybu xcalkiélo scásiʼ. Mod rioladxlo gony buñ looy, scúca buny layibu».

Jesús láaca bilitzbu ximod non guibiʼno cós ni napno. Goniʼbu: «Más rasac gacno ximig Jehová xalagary gapno xiroʼ bidxiich. Portín buñ gobáan labúu sabann xpidxiichlo per ni toib buñ sony que galsitlo de Jehová. Por ngú, diti tzoʼlo ló galrrasaʼ por xí guálo, xí gueʼlo o xí lairy guaclo. Bibiʼ manybiguin, Dios ran layimu par gapyimu xiroʼ galrro. Ná pal rioʼlo ló galrrasaʼ, diti sabanylo más. Bisetnaladx: Jehová nandxich xi caquiinlo».

Guirá buñcu dipa ma bicadiagyibu a toib buñ naniʼ xomod goniʼ Jesús. Guirá buñ ni gosanir nisló religión ló dzúcu diti bisuidyibu buñ scú. ¿Xigony gócbu toib galán mextra? Portín guirá ni bisuidybu bieedni de Jehová.

«Colguicaʼ yac yoog xtuni né colguisuidy de naʼ, portín naca buñ nadaʼa, né buñdxo, né labúu sasaladxto» (Mateo 11:29).