Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 69

Ángel Gabriel goyguen María

Ángel Gabriel goyguen María

Lainy gudx Nazaret ni noʼ Galilea golés toib mbioxhlas ni góc laa María né gócbu xfamily Elisabet. Ló dzúcu toib buñ ni bunytzaay yac ni góc laa José mápa mer gonybu galtzeʼel né María. Dzú ni Elisabet ma nap xhoop beʼo ni nacxiin, ángel Gabriel goyeebu ronoʼ María né goniʼbu: «María, looy naplo xcalnasác Jehová». Diti biembu ni góoch Gabriel láabu, por ngú Gabriel golexa láani scareʼ: «Sacxiinlo né saplo toib badaʼ. Non cueʼlo laabu Jesús. Láabu sony mandarybu né Gobierno xtunybu sioʼni por tipzó».

María cuapy: «Diti ma goyonéya ni toib buñguieeu. ¿Ximod tzoʼ toib xiinna?». Gabriel cuapy: «Diti noʼ galnagan par Jehová. Sacaʼlo xcalnadip Jehová né saplo toib badaʼ. Xfamilylo Elisabet láaca nacxiin». Ór cú María cuapy: «Naʼ naca xomós Jehová. Sagac ni nálo».

 María goyguenbu Elisabet lainy toib gudxyen ni goyoʼ laidy toib dainy. Órni bidxinbu cú, goniʼbu dioxh Elisabet, né badaʼ ni nacxiin Elisabet gosandop lainybu. Elisabet cuaʼ xcalnadip Dios né goniʼbu: «María, Jehová raduidy galnasác looy. Sacró rasaca que xinaʼ Señor xtuni guieed lidxi». María cuapy: «Ronyxiroʼya Jehová né guidopy xcalnabani». María biaʼan tzón beʼo lidx Elisabet né después bibiguetbu lidxbu Nazaret.

Órni José gon que María ma nacxiin ma diti gosaguelbu ñonybu galtzeʼel né María. Per toib ángel bireʼ ló xcaʼalbu né góoch láabu: «Diti guidzuibylo gonylo galtzeʼel né María. Portín diti bunybu ni toib cós mal». José bunybu galtzeʼel né María né goynébu tzeelbu lidxbu.

«Guirá ni raniiny Jehová ronybu láani lainy guibá né ló gudxlio» (Salmo 135:6).