Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 57

Jehová bixelbu Jeremías guiniʼ xtiitzbu

Jehová bixelbu Jeremías guiniʼ xtiitzbu

Jehová golúbu Jeremías par ñac profeta lainy gudx Judá. Bixelbu Jeremías ñaiby a guirá buñ ni golés cú nasian cós mal ni buny. Per Jeremías cuapybu Jehová: «Mbioxhlasiensa naʼ, diti labúu raniya nisló buñ». Jehová gochbu Jeremías: «Diti guidzuibylo, naʼ gaabi looy xi guiniʼlo né sacnéya looy».

Jehová gochbu Jeremías que natopbu guirá ancianos ni goyoʼ lainy gudxcú né nalaʼbu toib ruʼ nislóyibu né naniʼbu: «Scá sac Jerusalén». Órni buny Jeremías ngú, guirá ancianoscu nigolú bidzuitzyibu. Toib sacerdote ni góc laa Pasjur godimbu Jeremías né bilipbu Jeremías lad tipnés tablas. Guidopynac gueʼelcu diti labúu bisis Jeremías. Stoib dzúcu, Pasjur goleʼ láabu. Ór cú Jeremías goniʼ: «Ma bidzaga. Ma diti labúu saniya xtiitz Jehová más». Per ¿nigolúpa ma diti goniʼbu xtiitz Jehová la? Yaca. Después Jeremías gurú né bunybu pensary galán né goniʼbu: «Xtiitz Jehová nacni xomod toib guii ni noʼ nislaʼni. Diti labúu sasiana guiniya xtiitz Jehová». Jeremías diti bisian biduidy abís a guirá buñcu.

Después de xidal íz, goyoʼ stoib buñ ni gosaló buny mandary gudx Judá. Sacerdotes né profetas falz ni goyoʼ cú bianladxyibu Jeremías. Por ngú gochyibu a guirá príncipes: «Non guigaityno Jeremías». Jeremías cuapy layibu: «Pal guigaityto naʼ, sagaityto toib buñ ni diti nap dool. Naʼ raniya ni Jehová raiby naʼ, diti raniya ni ritzanlósi ló xpensari». Órni príncipes bicadiagyibu ni goniʼ Jeremías, goniʼyibu: «Diti non guigaityno láabu».

 Jeremías diti bisian goniʼ xtiitz Dios, por ngú príncipes bidzuitz né gonabyibu permís ló rey par nagaityibu Jeremías. Reycu biduidy lagary ñonybu né Jeremías nitisi nainy layibu, por ngú gonásyibu né goloʼyibu Jeremías lainy toib pós ro bidza been par ñaitybu cú. Dxoga, dxoga Jeremías gosaló biguich lainy been.

Ór cú Ébed-Mélec gochbu rey: «Príncipes goloʼyibu Jeremías lainy toib pós. Saitybu cú pal diti rabeʼno láabu». Ór cú rey bixelbu Ébed-Mélec toibsi né 30 buñguieeu par nabeʼyibu Jeremías lainy póscu. Diti goyoʼ ni bicaa Jeremías par naniʼbu xtiitz Dios. ¿Nainy looy gaclo xomod Jeremías ja?

«Guirá buñ sianladx lóoto por laaya, per ni rony guantary dada guidxin fin ngú ni salaa» (Mateo 10:22).