Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 59

Tap mbioxhlas ni bisob ni ná Jehová

Tap mbioxhlas ni bisob ni ná Jehová

Órni Nabucodonosor goynébu príncipes lainy gudx Babilonia, láabu bixelbu toib buñxirop ni góc laa Aspenaz ñan layibu. Nabucodonosor láaca gonab láabu nayopybu tipnés mbioxhlas ni nasacdxiich né naní xcalrrien lad guirá mbioxhlascu. Layibu bisuidyibu tzón íz par ñonyibu dxiin ni rasac lainy gudx Babilonia. Bisuidyibu ñoʼolyibu, nacaʼyibu né naniʼyibu diitz ni goniʼ buñ babilonios. Láaca non ñooyibu galrro ni godó buñ lainy palacio xtuny Nabucodonosor. Tap mbioxhlascu góc laayibu Daniel, Hananías, Misael né Azarías. Per Aspenaz goleʼ layibu xomod buñ babilonios: Beltsasar, Sadrac, Mesac né Abednego. Xpensarylo, ¿ni bisuidyibu lainy gudx Babilonia ñony que ñaladxyibu Jehová la?

 Tap mbioxhlascu goniiny nasobbu ni ná Jehová. Gondxichyibu que diti non ñooyibu tipnés galrro ni godó Nabucodonosor portín Ley xtuny Jehová goniʼ que diti non guáyibu galrro declascu. Por ngú gochyibu Aspenaz: «Ranabdo looy, diti gony lafuerslo lóodo guádo ni roo Nabucodonosor». Per Aspenaz goniʼ: «Pal diti rootzayto, né Nabucodonosor rabiʼ que nacto buñguitz, sagaitybu naʼ».

Daniel gochbu Aspenaz: «¿Nanlo la? Biduidy pór guixa né stipnés cuann guádo né nís gueedo ló 10 govitz. Né después guibiʼlo ximod nacdo né ximod nac guirá mbioxhlas ni godó xcalrro Nabucodonosor». Aspenaz bioladx ni goniʼ Daniel.

Órni godudy 10 govitzcu, Daniel né tzón ximig bienyibu más nasacdxiich que stipnés mbioxhlas ni godó xcalrro rey. Jehová bioladx mod bisobdiitz tap mbioxhlascu. Láaca biduidybu galnaní Daniel par labúu golexabu bacaʼal né visión.

Órni bilox tzón íz ni bisuidyibu, Aspenaz goynébu guirá mbioxhlascu nisló Nabucodonosor. Reycu goniné layibu né biduidybu cuent que Daniel, Hananías, Misael né Azarías más naní guicyibu que stipnés mbioxhlascu. Por ngú golúbu tap mbioxhlascu par ñony dxiin né láabu lainy palacio. Guirási ór reycu gonab xcalrracnéyibu. Jehová biduidy más galnann layibu, por ngú gonyibu más que guirá buñnan né buñ chiser ni goyoʼ Babilonia.

Daniel, Hananías, Misael né Azarías diti goyoʼyibu lainy xcudxyibu, ná scú guirá ór bisetnaladxyibu que nacyibu xcudx Jehová. ¿Looy láaca sasetnaladxlo Jehová ná diti noʼlo né bixioslo la?

«Diti guiduidylo lagary guibixladx buñ xcalmbioxhlaslo, xalagary ngú, diti cuenunysi guiniʼlo, diti cuenunysi gonylo, bislooy galnadxiʼ, fe, góc buñ nayaa par guisuʼyibu mod naclo» (1 Timoteo 4:12).