Rabiguet

Goyee ro ná índice xtuny contenidos

 LESIONY 60

Toib Gobierno ni sioʼ por tipzó

Toib Gobierno ni sioʼ por tipzó

Toibtica goxin, goniʼ xcaʼal Nabucodonosor. Goyoʼbu galrrasaʼ xí láani raduidy diitz ni goniʼ xcaʼalbu por ngú ma diti labúu gonás bacaʼal láabu. Bixelcaʼbu buñ chiser né goniʼbu: «Colgaiby ná xi raduidy diitz bacaʼal ni gopa». Layibu goniʼyibu: «Góoch lóodo xi goniʼ xcaʼalo». Per Nabucodonosor cuapy layibu: «¡Yaca! Lóoto colguiniʼ xí goniʼ xcaʼala, pal diti raniʼto, sagati lóoto». Ór cú gochyibu Nabuconodosor stoib: «Per góoch lóodo xi goniʼ xcaʼalo, ór cú labúu saibydo looy xi raduidyni diitz». Nabuconodosor cuapy layibu: «Náto guiscúto naʼ. ¡Colgaiby naʼ xi goniʼ xcaʼala!». Layibu cuapyibu: «Diti noʼ ni toib buñ ló Gudxlio ni labúu gony ni canablo. Portín nigolú naganni».

Nabucodonosor nigolú bidzuitz, por ngú goniʼbu gaity guirá buñnan ni noʼ lainy gudx Babilonia. Dada Daniel, Sadrac, Mesac né Abednego non ñaity. Per Daniel gonabbu tidxó tiemp par nabexabu bacaʼalcu, ór cú láabu né ximigbu gonabyibu xcalrracné Jehová. ¿Gocné Jehová layibu la?

Ló toib visión Jehová bislooybu Daniel xpacaʼal Nabucodonosor né xi raduidyni diitz. Stoib dzúcu, Daniel goninébu xomós reycu né goniʼbu: «Diti guigaityto ni toib buñnan ni noʼ lainy gudx reʼ, naʼ cuéxaya bacaʼal xtuny rey reʼ». Ór cú goynébu Daniel nisló Nabucodonosor. Daniel gochbu Nabucodonosor: «Dios cayaiby looy xi gac ló dzú ni sietra. Scareʼ goniʼ xcaʼalo: looy bibiʼlo toib imagen xiroʼ, guicni nac de or, lachdaʼni né xicni nacni de plata, lainyni né corni nacni de cobre, barlaisni nacni de hierro né ñeʼni nacni de hierro ni notz né been. Después toib guiee biroʼ guic toib dainy né cuáni ñeʼ imagen reʼ né imagen reʼ bioyni né gocni goxioo né bieed toib buu ne sané goxioocu. Guiee ni cuá ñeʼ imagencu gocni toib dainy né goyoʼni ló guidopynac gudxlio».

 Después Daniel goniʼ: «Ndeʼ raduidy diitz bacaʼal ni goplo: Gobierno xtunylo nacni guic imagen ni nac de or. Gobierno ni tzoʼ después de looy sácni de plata. Después sioʼ stoib gobierno ni gac de cobre né láani sony mandaryni ló guidopynac gudxlio. Último sioʼ toib gobierno ni sac nadip xomod hierro per láaca sac nagochni xomod been. Guiee ni radxin rac toib dainy láani ngú Gobierno xtuny Dios, sanitlóni guiráxadit gobierno ni noʼ né sioʼni por tipzó».

Nabucodonosor bixixip né biquichbu lóbu layoo nisló Daniel né goniʼbu: «Dios xtunylo golexa bacaʼal reʼ looy. Diti noʼ stoib Dios xomod láabu». Diti bigaitybu Daniel, xalagary ngú Nabucodonosor bunybu que Daniel nasanir nisló buñnan né bunybu que Daniel ñony mandary guirá gudxyen ni goyoʼ Babilonia. ¿Biduidylo cuent ximod cuapy Jehová ni gonab Daniel la?

«Né bitopyibu guirá buñreʼ lagary ni diitz hebreo laa Armagedón» (Apocalipsis 16:16).