Rabiguet

Goyee ro ná índice xtuny contenidos

 LESIONY 58

Jerusalén binitló

Jerusalén binitló

Buñ ni golés Judá xidal buelt bisianyibu Jehová né bienyibu dioxh falz. Por xidal íz Jehová biyopy mod ñacné layibu. Jehová bixel xidal profetas par ñoʼyibu ló diitz, per diti bicadiagyibu. Xalagary ngú, bixiichyibu ni goniʼ guirá profetascu. ¿Ximod goleʼ Jehová guirá dioxh falz ni goyoʼ cú?

Nabucodonosor ni buny mandary Babilonia binitlóbu xidal gudx xitzca saʼ. Dzú ni primerdiguieʼ binitlóbu Jerusalén gonásbu rey Joaquín, gonásbu príncipes, soldad né buñ ni nan rasaʼ cós, né goynéyibu guirá buñreʼ gudx Babilonia. Láaca goynébu guirá cós ni rasac ni goyoʼ lainy yoʼ ro bienyibu Jehová. Después Nabucodonosor golúbu Sedequías par ñony mandary lainy gudx Judá.

Primer, Sedequías bisobdiitzbu guirá ni goniʼ Nabucodonosor. Per guirá gudxrop ni goyoʼ gahxca ronoʼbu né profet falz bikíilyibu Sedequías par nareʼbu xan xomandary Babilonia. Jeremías góoch láabu: «Pal guireʼlo xan xomandarybu, saity xidal buñ, sioʼ galrralán né galguitz lainy gudx Judá».

Órni Sedequías ma sané xhoon íz ló galmandary, goloʼbu guicbu guicalóbu Babilonia por ngú gonabbu xcalrracné Egipto. Ór cú Nabucodonosor bixelbu guirá soldad xtunybu par nanitlóyibu Jerusalén. Guirá soldad xtuny Babilonia bigooyibu Jerusalén né Jeremías gochbu Sedequías: «Jehová ná que pal rasoblo rey xtuny Babilonia, looy né gudx reʼ salaato. Per pal gaibylo guicalólo layibu, sasaʼijyibu Jerusalén né sinéyibu looy  press lainy gudx Babilonia». Sedequías cuapy: «¡Diti sasoba láabu!».

Órni godudy toib íz gorol, buñ babilonios bicantaʼyibu muros xtuny Jerusalén né bisaʼijyibu láani. Láaca bisaʼijyibu yoʼ ro bienyibu Jehová, bigaityibu xidal buñ né gonásyibu xidalguixo buñ né goynéyibu guirá buñcu lainy gudx Babilonia.

Sedequías bixonybu bireʼbu Jerusalén, per buñ babilonios cuanal láabu. Gonásyibu Sedequías gahxca Jericó né goynéyibu Sedequías ronoʼ Nabucodonosor. Reycu buny mandarybu Sedequías nabiʼ ximod cagaityibu ximbioxbu, ór cú goxbu bisaló Sedequías né goloʼbu Sedequías lachquiip né cú goitybu. Per Jehová gochbu a guirá buñ de Judá: «Sadudy 70 íz né ór cú sadxigueta lóoto lidxto lainy gudx Jerusalén».

¿Xí nasaclóo guirá mbioxhlas ni goynéyibu gudx Babilonia? ¿Bunyibu ni ná Jehová la?

«Jehová Dios, ni nap Xiroʼgolu galnadip, órni rony reglarlo toib cós xinésnipani ronylo» (Apocalipsis 16:7).