Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Ni labúu guisudi ló la Biblia

 LESIONY 63

Tipnés diitz ni cuá cueʼ yoʼ

Tipnés diitz ni cuá cueʼ yoʼ

Después ma Belsasar bidxin buny mandary gudx Babilonia. Toib gueʼel, bunybu toib lanii né biruʼbu tipmil buñ, né guirá buñ ni biruʼbu gocyibu por buñnan ni goyoʼ lainy gudxcú. Bixelbu xomósbu nitné tipnés bás de ór ni Nabucodosor goleʼ lidx Jehová. Belsasar né guirá buñ ni biruʼbu goʼyibu lainy guirá báscu né gosaló bienyibu xtioxhyibu. Tisintiempsi bibiʼyibu ña toib buñ ni bicaʼ tipnés diitz cueʼ yoʼ né diti bienyibu xí náni.

Belsasar nigolú bidzuiby. Bixelcaʼbu buñ chiser né goniʼbu: «Ni cuéxa ni ná diitzreʼ naʼ soni que gacbu ni rion buñ ni más rasac lainy gudx Babilonia». Guirá buñcu biyopyibu mod nabexayibu ni ná diitzcu per diti labúu golexayibu láani. Ór cú bidxin tzeelbu né goniʼ: «Noʼ toib buñ ni laa Daniel, láabu golexabu ni diti bieen Nabucodonosor. Labúu sabexabu ni ná guirá diitzreʼ».

Daniel goyeebu ronoʼ reycu. Órni bidxinbu, Belsasar góoch láabu: «Pal labúu soʼol lo né sabexalo ni ná diitzreʼ, sascada toib caden de ór looy né soni que gaclo ni rion buñ ni más rasac lainy gudx reʼ». Daniel cuapy láabu: «Saabi looy ni ná diitzreʼ, per diti nainy naʼ guicaʼya galrrascad. Bixioslo Nabucodonosor gócbu buñ farmay per Jehová goloʼ xcalrriembu par gócbu buñdxo. Looy nandxichlo guirá ni gosaclóo bixioslo, per ná scú diti goplo respet Jehová. Cuaʼlo bás de ór ni goyoʼ lidxbu né goʼlo lainyni. Por ngú Dios bicaʼ diitzreʼ: MENÉ, MENÉ, TEQUEL PARSÍN. Né náni que buñ medos né persas sonyibu gan Babilonia né looy ma diti saclo rey».

Ló dzúcu ralooypani diti ñoʼ ni labúu nanitló gudx Babilonia portín gopni muros ni nasoʼdii né goyoʼ toib guʼuc roʼ rolooni. Per gueʼelcuca, buñ medos né  persas goyoʼyibu Babilonia. Ciro, ni góc rey persa bitzaʼbu xinés nís guʼuc cú par labúu nadudy soldad né ñoʼyibu lainy gudx Babilonia. Órni bidxinyibu, ¡xobialsaa xpuertni! Soldad gosaló godíilyibu, bunyibu gan gudx Babilonia né bigaityibu rey Belsasar. Ór cú ma Ciro gosaló buny mandary gudx Babilonia.

Ló primer íz ni buny mandary Ciro goniʼbu: «Jehová góoch naʼ guilísa lidxbu ni noʼ Jerusalén. Judíos ni ná gacné guiaʼ yoʼcu, labúu tzeeyibu». Por ngú, después de 70 íz ni binitló Jerusalén xidal buñ judíos ma labúu bibiguetyibu xcudxyibu. Modcu birebuʼ xtiitz Jehová. Ciro láaca bidxiguetbu guirá bás de ór né plata né stipnés cós ni Nabucodonosor goleʼ lainy lidx Jehová. ¿Biduidylo cuent ximod biquiin Jehová Ciro par gocnébu xcudxbu la?

«¡Ma biab! ¡Babilonia la Grande ma biab, né ma nacni lagary ro dxee demony» (Apocalipsis 18:2).