Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 107

Ragasguieeyibu Esteban

Ragasguieeyibu Esteban

BUÑGUIEEU ni rabilo naxixip, laabu Esteban. Nacbu toibtica buñ ni racanal Jesús. ¡Per bibiʼ ni cayac né láabu! Tipnés buñguieeu cagasguiee láabu. ¿Xigony rianladxgolúyibu Esteban? Guibino.

Dios racné Esteban par gony xidal galrradziguiaʼ. Tipnés buñguieeu diti rioladx ni ronybu né radíldiitzyibu né Esteban por ni rasuidybu stipnés buñ ni ná Jesús. Per Dios raduidy xiroʼ galnann Esteban, né rabébu loguiaʼ que guirá buñguieeu reʼ pór galrrascú casuidy. Ndeʼ rony que layibu radzuitzgolúyibu, né por ngú ranásyibu Esteban né raxelcaʼyibu tipnés buñguieeu par guiniʼ pór galrrascú de láabu.

Ni rasanir nisló israelitas par gony adoraryibu Jehová ranabdiitz láabu: ¿Nigolú ni raniyibu la? Esteban racapy né toib discurs ni golébu ló la Biblia. Órni ma casloʼoxbu xtiscursbu rasetlabu que tipnés buñguieeu mal bianladxyibu buñ ni Jehová bixel nírcu, par guiniʼ xí gac dzú ni sietra. Láaca goníbu: Lóoto scúca nacto. Bigaityto Jesús ni rony xchiin Jehová, né diti rasobto ni ná xileybu.

¡Ni rony Esteban ratzuitzgolúni guirá ni rasanir lainy toib religión! Né por ni cadzuitzgolúyibu ro ló láayibu. Per órni Esteban ralís guic ranibu: ¡Colguibí! Rabíya Jesús sagaʼ ladbuʼ Dios lainy guibá. Racañayibu guidiagyibu par diti guienyibu né ranásyibu Esteban. Rasobioyibu Esteban hasta fuer de gudxcú.

Lagary reʼ rabeʼyibu xhapyibu né raduidyibu láani toib mbioxhlas ni laa Saulo par gann láani. ¿Rabilo Saulo ló dibuj reʼ la? Ór cú rasaló ragasguieeyibu Esteban. Láabu raxixipbu mod rabilo, né rasaló ranabbu lóo Dios: Jehová, diti gony castigarlo layibu pór cós mal reʼ. Láabu nambu que tipnésyibu bicadiag pór galrrascú ni goní ni rasanir lainy toib religión. Órni ralox ranibu ndeʼ raitybu.

Órni noʼ toib ni rony mal looy, ¿ronylo láabu scúca o ranaplo lóo Dios gony castigar láabu la? Esteban né Jesús diti bunyibu ngú. Layibu gocyibu buñtzay né buñ ni góc nigolú mal né layibu. Lóono non gonyno mod bunyibu.

Hechos 6:8-15; 7:1-60.