Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 109

Pedro riguen Cornelio

Pedro riguen Cornelio

LÓ DIBUJ rabilo Pedro sagaʼ, né xiitzbu noʼ tipnés ximigbu. Per ¿xigony caxixip buñguieeu reʼ nisló Pedro? ¿Non gonybu láani la? ¿Nanlo chú láabu la?

Buñguieeu reʼ laa Cornelio. Nacbu toib buñxirop ni rony mandary xidalguixo soldad de gudx Roma. Cornelio diti rimbubu Pedro, per noʼ ni góoch láabu que gony invitarbu Pedro lidxbu. Ganno ximod góc ndeʼ.

Buñ ni primer cuanal Jesús gocyibu pór buñ judíos, per Cornelio diti buñ judío láabu. Ná scú láani, láabu nadxibu Dios, raninébu Dios né racnébu buñ. Toibtica godzu toib ángel raiby láabu: Dios rioladx mod nacloʼ, né láabu sacapybu ni gonablo láabu. Bixel buñ tze tzayopy toib buñguieeu ni laa Pedro. Láabu noʼbu lainy gudx ni laa Jope, lidx Simón, ni rabés gahx roʼ nisdaʼ.

Ni maca Cornelio rony ni raiby ángel reʼ láabu. Stoib dzúcu, Pedro noʼ guic yoʼ lidx Simón. Lagarycu Dios rony que Pedro ralooypa cabí toib lairygueʼel ni sietj guibá. Loni dxee bisaʼ clas nimal. Ley ni Dios biduidy náni que guirá nimal reʼ diti nayaamu par guá buñ láamu, per toib rudx ná: Pedro, biás bigaity né godó.

Pedro racapy: ¡Yaca! Diti ma goyoʼ dzú godóya galrro ni diti nayaa. Per rudx cú raiby láabu: Ma diti guinilo diti nayaa, ni Dios nigoreʼ raniʼ nayaa. Tzón buelt rudx cú rabyni ndeʼ Pedro. Laʼga Pedro cayony xpensary xí raduidy diitz guirá ndeʼ, radxiin ronoʼbu tipnés buñguieeu ni Cornelio bixel par guiyopy láabu.

Pedro rietj né raniʼ: Naʼ ngú buñguieeu ni cayopyto. ¿Xigony cayopyto naʼ? Órni layibu raibyibu Pedro que toib ángel góoch Cornelio ñony invitarbu Pedro lidxbu, ór cú Pedro rasaguel tze né layibu. Stoib dzúcu, Pedro né tipnés ximig rieyibu riguenyibu Cornelio gudx Cesarea.

Cornelio ma bitop guirá xfamily né ximigdxin toibsi lagary. Órni Pedro radxiin, Cornelio raxixip nisló Pedro, xomod rabilo ló dibuj reʼ. Pedro ni maca raiby láabu: Biás portín láaca toib buñgudxlio naʼ. Scú láani, la Biblia rasuidy que diti láani ngú guixixipno par gony adorarno toib buñgudxlio. Nosi Jehová non gony adorarno.

Nigoreʼ Pedro rasaló raniʼ xtiitz Dios nisló guirá buñ ni dxee cú. Pedro raniʼ: Radudi cuent que Dios racacuent guirá clas buñ ni ná gony xchiimbu. Laʼga caniʼbu, Dios rasiab fuers ni raquiin par gonybu ni nábu, né guirá buñ ni dxee cú rasaló raniʼ xidal clas diitz. Ndeʼ rony que radziguiaʼ tipnés ni racanal a Jesús ni nac buñ judíos ni buny compañer Pedro, portín layibu bunyibu pensary que Dios nosi ragobioo buñ ni nac judíos. Ndeʼ rasuidy layibu que Dios diti rabíbu que toib gudx más rasac que stipnés. ¿Diti galán guisetnaladxno ndeʼ la?

Hechos 10:1-48; 11:1-18; Revelación 19:10.