Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 103

Lainy cuart ni nayeg

Lainy cuart ni nayeg

ÓRNI Pedro né Juan rareʼyibu roʼ baʼ ro bigach Jesús, toib María rian. Rasaló ribdxaʼbu. ¡Ór cú raguixlóbu lainy baʼ né rabíbu chop ángeles! Layibu ranabdiitzyibu María: ¿Xigony cayibdxaʼlo?

María racapy: Ma sanéyibu Jesús né diti naana pu lagary noʼbu. Ór cú rabiguetbu né rabíbu toib buñguieeu. Buñguieeu reʼ ranabdiitz láabu: ¿Chú láabu cayopylo?

Xpensary María ngú que buñguieeu reʼ rap lagary reʼ, né que sigory láabu ngú ni sané laidy Jesús. Por ngú ranibu: Pal looy sanélo láabu góoch ná pu bisianlo láabu. Per buñguieeu reʼ ngú Jesús. Ma nacbu toib buñ ni María diti rimbu. Per órni buñguieeu reʼ raniʼ laabu, María raduidy cuent que Jesús caniné láabu. Né ni maca raxonybu raibybu láani a xpiin Jesús: ¡Ma bibiʼya Jesús!

Dzúcu laʼga chop xpiimbu riée ranch ni laa Emaús, toib buñguieeu goyoʼ ladyibu ló néz. Xpiimbu nigolú noyibu nabann por ni goity Jesús. Laʼga casaayibu buñguieeu reʼ rabexa xidal cós ni rasetlaa la Biblia né layibu rasacyibu sacró. Radxiin midid, órni rasagadzuyibu par guáyibu, xpiimbu raduidy cuent que buñguieeu reʼ nac Jesús. Láabu tisintiempsi ranitbu, né xpiimbu rabiguet Jerusalén par tzágudxyibu stipnés xpiin Jesús xi ni góc.

Laʼga cayac guirá ndeʼ, Jesús tisintiempsi radxiin ronoʼ Pedro. Stipnés xpiin Jesús nigolú rabaladxyibu órni racadiagyibu ndeʼ. Ór cú chop xpiin Jesús rieyibu Jerusalén né radzelyibu stipnés xpiin Jesús. Raniyibu que Jesús bireʼ lóoyibu ló néz. Né órni caniʼyibu guirá ni gosacloyibu, ¿nanlo xí galrradziguiaʼ rac la?

Bibiʼ dibuj reʼ. Jesús tisintiempsi radxiin ronoʼyibu lainy cuart ro dxeeyibu, ná puert cú nayegni. ¡Xpiimbu rabaladx! ¡Dzúcu rioʼyibu goxt! ¿Labúu guigaplo balac buelt bibiʼyibu Jesús la? ¿Nacní gáay buelt la?

Toibtica xpiimbu ni laa Tomás diti noʼ né layibu órni rabíyibu Jesús. Por ngú, xpiin Jesús raiby láabu: ¡Bibino Jesús! Tomás ná que par guiluladxbu que nigolú Jesús nabany laʼpabu non guibíbu Jesús. Radudy xhoon govitz, xpiin Jesús stoib buelt noyibu lainy cuart ni nayeg, né par nigoreʼ Tomás ma noʼ né layibu. Tisintiempsi rabíyibu Jesús lainy cuart. Nigoreʼ Tomás raluladx.

Juan 20:11-29; Lucas 24:13-43.