Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 84

Toib ángel riguen María

Toib ángel riguen María

GONAʼ móz ni rabilo ló dibuj reʼ laa María. Buñ israelita láabu, né rabésbu gudx Nazaret. Dios nandxich que nacbu toib gonaʼ tzaay. Por ngú bixelbu toib ángel ni laa Gabriel par guininé María. ¿Nanlo xí ni cayaiby Gabriel a María la? Guibino guidoni.

Gabriel raniʼ dioxh María né raiby láabu: Xiroʼ xilaay Jehová naplo, né noʼbu né looy. María ni toib buelt ma bibiʼbu buñ de clas cú. Rioʼbu ló galrasaʼ portín diti nambu xí láani ná Gabriel. Órcuca Gabriel racné láabu par diti tzóbu ló galrasaʼ.

Gabriel raibybu María: Diti guidzuibylo, Jehová rabaladx mod nacloʼ. Por ngú gonybu toib galrradziguiaʼ né looy. Diti saclani sioʼ toib xiinlo. Né non cuélo laabu Jesús.

Badaʼ reʼ gacbu toib buñxirop, né gac laabu Xiin Dios ni noʼ más Guiaʼ, ná Gabriel. Jehová sony láabu toib buñ ni gony mandary xomod góc David. ¡Per Jesús sony mandary por tipzó né Gobierno xtunybu diti saduidy xtzúni!

María ranabdiitz láabu: Per ¿ximod gac guirá ndeʼ? Naʼ diti noʼ tzeʼela né diti rabesnéya buñguieeu, ¿ximod labúu tzó toib xiinna?

Gabriel raiby láabu: Sacaʼlo xcalnadip Jehová. Mbioxien reʼ gac laabu Xiin Dios. Ór cú Gabriel raiby láabu: Bisednaladx xfamilylo Elisabet. Buñ goní que ma nigolú buñgol láabu par tzó xiimbu. Per mápa mer tzó xiimbu. Por ngú, biduidy cuent que diti noʼ cós nagann par Jehová.

Órcuca María racapy láabu: ¡Naʼ noʼya xan xomandary Jehová! Sa gac né naʼ mod goniʼlo. Órcuca ángel reʼ rareʼ ronoʼbu.

María rac naguel par tze tzatixlóo Elisabet. Órni Elisabet racadiagbu raniʼ María, badaʼ ni noʼ lainy Elisabet rasandop portín rabaladxbu. Elisabet racaʼbu xiroʼ fuers ni Dios raquiin par gonybu ni nábu né Elisabet raiby a María: Looy nigolú naplo xiroʼ xilaay Jehová lad buñgonaʼ. María rian yaaca tzón beʼo ronoʼ Elisabet, né ór cú rabiguetbu Nazaret.

Diti xidzú María ma tze guicaʼ José láabu. Per órni José ran que María ma nacxiin, ronybu pensary diti galán guicaʼbu María. Ór cú ángel xtuny Dios raiby láabu: Diti guidzuibylo guicaʼlo María par gac tzeʼel lo. Portín badaʼ ni gapbu Xiin Dios láabu. Por ngú José né María ronyibu galtzeʼel, né rabésbu gál Jesús.

Lucas 1:26-56; Mateo 1:18-25.