Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 101

Ragaityibu Jesús

Ragaityibu Jesús

¡BIBIʼ cós nadzuʼpy ni cayac reʼ! Cagaityibu Jesús. Nalxigaʼbu ló toib yac nadop. Caa clab ñabu né ñeʼbu. ¿Xigony noʼ buñ ni ná gony ndeʼ?

Nacní portín tipnés buñ rianladx láabu. ¿Nanlo chú layibu la? Toibticabú ngú toib ángel mal ni laa Buñdzab. Láabu bunybu que Adán né Eva nasianyibu nasobdiitzyibu Jehová. Né Buñdzab buny que xi enemig Jesús buny cós nadzuʼpy reʼ né bigaity láabu.

Órni yása guigalxigaʼyibu Jesús ló yac nadop ronyibu xidal cós mal Jesús. ¿Rasetnaladxlo bieedyibu lainy lagary sacró ni laa Getsemaní né gonásyibu Jesús la? ¿Chú layibu góc guirá enemig cú? Scú láani, nacyibu guirá ni rasanir nisló toib religión. Nigoreʼ guibino xí láani rac.

Órni guirá ni rasanir ló toib religión ranásyibu Jesús, xpiimbu radzuiby né raxony, rasianyibu Jesús toib né xí enemig. Per Pedro né Juan ni nac xpiin Jesús diti ralsityibu. Racanalyibu gahx par ganyibu ni cayac né Jesús.

Guirá ni rasanir par gony goʼox rinéyibu Jesús nisló toib xogol ni laa Anás, ni láaca gosanir nisló israelitas par gony goʼox. Xidalguixo buñ ni noʼ cú diti raclayibu lagary reʼ. Ór cú rinéyibu Jesús lidx Caifás, ni nigoreʼ ma nac ni rasanir nisló isrelitas par gony goʼox. Lagarycu noʼ xidal buñ ni rasanir ló toib religión.

Reʼ lidx Caifás rieedyibu par ganyibu pal Jesús nap dool né ritnéyibu tipnés buñguieeu par guiniʼ pór galrrascú de Jesús. Guirá ni rasanir ló toib religión raniʼ: Guigaityno Jesús. Ór cú rasaló rachixunyibu lóo Jesús, né racaʼbu panet Jesús.

Laʼga cayac guirá ndeʼ, Pedro noʼ láachluʼ. Toib gueʼel nachich láani, né buñ ni dxee cú ragoʼ guii. Laʼga dxeeyibu cadzaʼyibu roloo guii, toib criat ni noʼ cú rabíbu Pedro né ranibu: Buñguieeu reʼ láaca goyoʼbu né Jesús.

Pedro ni maca racapy: ¡Yaca, naʼ diti goyoʼya né láabu!

Tzón buelt buñ ni dxee cú raibyibu Pedro, que láabu goyoʼbu né Jesús. Per ló tzón buelt reʼ Pedro racapy que ditini nigolú. Ni rion buelt racapy Pedro ndeʼ, Jesús radxiguet lóo né rabí láabu. Pedro rasac nabann por ni biscú, rareʼbu né ribdxaʼdootbu.

Órni rareʼ lóo Govitz vierna rosil, ni rasanir nisló israelitas par gony goʼox rinéyibu Jesús ro radop Sanedrín. Lagary reʼ rooyibu diitz xi gonyibu Jesús. Rinéyibu Jesús ronoʼ Poncio Pilato, ni rony mandary guidopynac Judea.

Raibyibu Pilato: Buñguieeu reʼ mal láabu. Non gaitybu. Órni ralox ranabdiitz Pilato a Jesús, ranibu: Naʼ diti rabíya que bunybu cós mal. Ór cú Pilato rony que guinéyibu Jesús ronoʼ Herodes Antipas, ni rony mandary Galilea, ni noʼ Jerusalén. Ndeʼ láaca rabí que Jesús diti buny cós mal, por ngú radxiguetbu Jesús ronoʼ Pilato stoib.

Pilato ná guislaʼ Jesús. Per buñ ni nac xi enemig Jesús nainy que stoib buñ ni noʼ press guiré, láabu ngú toib gobáan ni laa Barrabás. Nigoreʼ mápa gac galadzú órni Pilato rabeʼ Jesús fuer. Pilato raiby buñ ni dxee cú: ¡Colguibí! ¡Ni rony mandary lóoto! Per ni rasanir nisló israelitas par gony goʼox racaʼyibu rudx: ¡Goleʼ láabu! ¡Bigaity láabu! Scú gocni, rinéyibu Jesús par gaity, né Barrabás rareʼ press.

Vierna ma godudy galadzú ragalxigaʼyibu Jesús ló yac nadop. Ló dibuj diti labúu rienlólo láani, per guirop lad cué Jesús nalxigaʼ toib buñ mal, par gaity. Órni mápa gaity Jesús toibticabú raiby a Jesús: Bisednaladx naʼ órni ma cayony mandarylo lainy Gobierno xtunylo. Jesús racapy láabu: Radudi xtiidza looy sioʼlo né naʼ lainy Gudxlio móz.

¿Diti nac ndeʼ toib diitz sacró ni goní Jesús gony la? ¿Nanlo de xí Gudxlio móz caniʼ Jesús la? ¿Pu goyoʼ lagary móz ni Dios bisaʼ nirdiguié? Scú láani, looca Gudxlio. Né órni Jesús gony mandary lainy guibá, salísbu buñguieeu reʼ par guibanybu goxt ló Gudxlio móz reʼ. ¿Diti rabaladxno por ni gony Jesús la?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.