Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 88

Juan ragonis Jesús

Juan ragonis Jesús

BIBIʼ palom ni cayetj niis guic buñguieeu ca. Buñguieeu reʼ ngú Jesús. Nigoreʼ mápa mer gapbu 30 íz. Né ni noʼ né láabu ngú Juan. Ma bisuidyno tidxo de Juan. ¿Rasetnaladxlo órni María goyguen xfamilybu Elisabet, né badaʼ ni noʼ lainybu bisandop portín bibaladxbu la? Badaʼ ni yása gál dzúcu láabu ngú Juan. Per ¿xí cayony Juan né Jesús nigoreʼ?

Juan bilox binidxbu Jesús lainy nís guʼuc Jordán. Scá rionis buñ. Buñ rioʼ guidopynac lainy nís, né ór cú rareʼbu. Ndeʼ ni rony Juan, por ngú raniʼ buñ láabu Juan ni Ragonis. Per ¿xigony golonisbu Jesús?

Juan buny láani portín Jesús bieed ronoʼbu par tzonis. Juan ragonis buñ ni ná guislooy que rioʼobni layibu por cós mal ni bunyibu. Per ¿noʼ cós mal ni buny Jesús ni rioʼobni láabu par tzonisbu la? Yaca, Jesús diti bunybu cós mal, portín Xiin Dios láabu ni bietj guibá. Por ngú, napbu stoib razón par guinabbu Juan conis láabu. Guisuidyno xí razón gopbu.

Dzú yása ñeed Jesús ronoʼ Juan, toib carpinter láabu. Toib carpinter ngú ni ronytzaay yac, xomod mexh, xilet né bank. José, tzeʼel María gócbu buñ ni bunytzaay yac, né láabu bisuidybu Jesús dxiinreʼ. Per Dios diti bixel Xiin par gac toib buñ ni gontzaay yac ló Gudxlio. Napbu toib dxiin ni rasac par Jesús, né ma bidxin ór par gony Jesús láani. Por ngú, par guislooybu que bieedbu par gonybu xchiin Bixiosbu, Jesús ranab Juan que conis láabu. ¿Rioladx Dios ndeʼ la?

Scú láani, rioladxbu portín órni rareʼ Jesús lainy nís, toib rudx ni sieed guibá ná: Ndeʼ xiingaʼna ni rony que rabaladxi. Láaca, ralooypani guibá raxal né palom reʼ rietj ronoʼ Jesús. Ralooypani toib palom per diti scú láani, nacní fuers ni Dios raquiin par gonybu ni nábu.

Nigoreʼ Jesús nap xí de gony pensary ló xidal cós, por ngú riebu toib lagary ro yadi buñ por 40 dzú. Lagarycu Buñdzab radxiin ronoʼbu. Tzón buelt Buñdzab rayopy mod que Jesús diti guisob xiley Dios. Per Jesús diti riab ló xtoʼ Buñdzab.

Ralox radudy Jesús ló ndeʼ, rabiguetbu né rimbubu tipnés buñguieeu ni radxiin rac primer xpiimbu. Tipnésyibu nac: Andrés, Pedro (ni láaca laa Simón), Felipe né Natanael (ni láaca laa Bartolomé). Jesús né guirá biinreʼ rieyibu niis roloo Galilea. Radxinbu xcudx Natanael ni laa Caná, lagary reʼ Jesús riée ro cayac toib galtzeʼel, né ronybu primer galrradziguiaʼ. ¿Nanlo xí láani la? Ronybu que nís radxiin rac vino.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.