Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 96

Jesús rasial buñguitz

Jesús rasial buñguitz

LAʼGA Jesús rasaa lainy gudx, rasialbu buñguitz. Xidal buñ radxiin ran galrradziguiaʼ ni ronybu roloo gudx. Por ngú, rinéyibu buñ ni diti labúu rabí, xot, né bisaʼ clas buñguitz. Né Jesús rasial guiráyibu.

Ma godudy más de tzón íz de goló golonis Juan Jesús. Jesús raiby xpiin que ma yaaca tzébu Jerusalén, ro tzó ni guigaity láabu, né ór cú siásbu lad buñ ni ma goity. Láabu diti rasiambu de guisialbu buñguitz.

Toibtica dzú Jesús noʼ casuidy dzú sábda. Dzú sábda nacní dzú ni rasaladx judíos. Buñgonaʼ ni rabilo reʼ por dieciocho íz diti labúu golondopbu laidybu. Por ngú, Jesús raguiʼx ña laidybu, né laidybu riondop. ¡Ma nasacdxiichbu!

Ndeʼ rony que buñguieeu ni rasanir lainy toib religión radzuitz. Noʼ xhoop govitz par gac dxiin, racaʼ toibbu rudx a xidalguixo buñ ni dxee. ¡Dzúcu nacní par guieed buñ né guial, diti dzú sábda!

Per Jesús racapy: ¡Buñ mal! Cualquier de lóoto naxach xpor né niné láamu par gueʼmu nís dzú sábda. Por ngú, ¿diti non guiaal buñgonaʼ reʼ, ni bixoʼ dieciocho íz la? Ni racapy Jesús raduidy galnatoy guirá buñguieeu mal reʼ.

Más godzu, Jesús né xpiin rieyibu Jerusalén. Órni radxiinyibu gahxca gudx Jericó, chop buñ pobre ni diti labúu rabí racaʼ rudx: Jesús, gocné lóodo.

Jesús racaʼ rudx chop biinreʼ né ranabdiitz: ¿Xí náni lóoto gony né lóoto? Layibu raniyibu: Xoʼ, nainy lóodo guixal bisalódo. Jesús ragann bisalóyibu, ¡né ni maca rien lóoyibu! ¿Nanlo xigony rony Jesús guirá galrradziguiaʼ reʼ la? Portín nadxibu buñ né nainy láabu gap buñ fe láabu. Ndeʼ raduidy diitz órni gony mandarybu ló Gudxlio diti sioʼ ni guixoʼ stoib.

Mateo 15:30, 31; Lucas 13:10-17; Mateo 20:29-34.