Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 89

Jesús rasiá yoʼ xiroʼ

Jesús rasiá yoʼ xiroʼ

¿CADZUITZ Jesús reʼ la? Scú láani. ¿Nanlo xigony la? Portín tipnés buñguieeu ni noʼ lainy yoʼ xiroʼ ro rac adorar Jehová ni sob Jerusalén nacyibu buñ ni rasobladx. Rayopyibu mod cuéyibu xpidxiich guirá buñ ni rieed rony adorar Jehová.

¿Rabilo yós né xiil né palom ni dxee ca la? Buñguieeu ni dxee lainy yoʼ xiroʼ xtuny Jehová, reʼca ratoʼyibu guirá nimal reʼ. ¿Nanlo xigony la? Nacní portín israelitas raquiinyibu nimal né manybiguin par guiscadyibu Dios.

Xiley Dios goní que órni toib israelita rony galkié, non tzó ni guiscadbu Dios per láaca goyoʼ stoib ór israelitas bunyibu ndeʼ. Per ¿pu labúu guidzelyibu manybiguin né nimal par guiscadyibu Dios?

Tipnésyibu bital manybiguin né nimal par guiscadyibu Dios. Per xidal israelitas diti gop nimal ni manybiguin. Stipnésyibu golés sit Jerusalén né diti labúu ritnéyibu nimal par guiscadyibu Jehová lainy yoʼ xiroʼ. Por ngú buñ rieed lagary reʼ rasiʼ nimal né manybiguin ni raquiinyibu. Per guirá buñreʼ nigolú car bitoʼyibu nimal reʼ. Golannyibu xpidxiich guirá buñ. Diti láani ni bunyibu, ni bitoʼyibu nimal lainy yoʼ xiroʼ ro rac adorar Jehová.

Ndeʼ rony que radzuitz Jesús. Por ngú rachiʼixbu mexh ronoʼ bidxiich, né nilas raretzlasni layoo. Láaca rasaʼbu toib doʼ né raquiimbu láani par cuébu guirá nimal lainy yoʼ xiroʼ. Rony mandarybu ni ratoʼ palom: ¡Colcueʼ layimu lagary reʼ! Diti gonyto que lidx bixiosa gac toib lagary ro gonyto xiroʼ bidxiich.

Tipnés xpiimbu noʼ né láabu lainy yoʼ xiroʼ ni sob lainy gudx Jerusalén. Radziguiaʼyibu órni rabíyibu ni rony Jesús. Ór cú rasetnaladxyibu ni la Biblia raniʼ gony Xiin Dios: Galnadxi por lidx Dios sooni láabu xomod toib guii.

Laʼga Jesús noʼ Jerusalén ló lanii ni laa Pascua, ronybu xidal galrradziguiaʼ. Ór cú, Jesús rareʼ Judea né rabiguet Galilea. Per radudybu roloo gudx Samaria. Guibino xí rac lagarycu.

Juan 2:13-25; 4:3, 4.