Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 100

Jesús lainy lagary sacroyen

Jesús lainy lagary sacroyen

ÓRNI bireʼyibu lainy cuart, Jesús né xpiin riée lagary sacroyen ni laa Getsemaní. Xidal buelt ma bieedyibu lagary reʼ. Jesús nigoreʼ raiby layibu guiguanáyibu né guinabyibu lóo Dios. Jesús ralsit tidxo, raxixipbu né ranabbu lóo Dios.

Órni rabiguetbu ronoʼ xpiimbu. ¿Nanlo xí cayony xpiimbu la? ¡Dxeeyibu natiasyibu! Tzón buelt Jesús raiby layibu guiguanáyibu, per guirá ór ni rabiguetbu xpiimbu dxee natiasy. Jesús raniʼ por último órni rabiguetbu: ¿Ximod nga raduidyto lagary guinás bacaʼal lóoto nigoreʼpa? Ma bidxin ór tzó ni gonycuent naʼ a xi enemiga.

Ralox ranibu ndeʼ, rien xiruid xidalguixo buñ ni sieed. ¡Bibiʼ! ¡Sieed buñ né xí espad né yac! Né néyibu guur par guisaní ro dxeeyibu. Órni rabigaxyibu, toib ni sieed lad xidalguixo buñreʼ radxiin ronoʼ Jesús. Raduidybu toib bixit Jesús, mod rabilo ló dibuj reʼ. ¡Buñguieeu reʼ nac Judas Iscariote! ¿Xigony raduidybu toib bixit Jesús?

Jesús ranabdiitz: Judas, ¿por toib bixit ronycuentlo naʼ la? Scú láani, né bixit reʼ biduidy Judas diitz chú ngú Jesús, ni layibu cayopyibu. Por ngú xi enemig Jesús rasanir par guinásyibu Jesús. Per Pedro diti saduidy lagary guinásyibu Jesús sin gonybu xitcal. Rabébu espad ni nébu né rachocbu guidiag ladbuʼ buñguieeu ni sagaʼ gahx ronoʼbu. Per Jesús ragann guidiag buñguieeu reʼ né rasialbu láani.

Jesús raiby Pedro: Bidxiguet espad lidxni. ¿Diti raluladxlo que labúu guinaba Bixiosa guixel xidalguixo ángeles par guilaa naʼ la? Scú, labúu ñonybu láani. Per Jesús diti ranab lóo Dios gacné láabu portín ma nambu que ma bidxin ór que xi enemigbu guinás láabu. Láabu raduidybu lagary que gonyibu ndeʼ. Guibino nigoreʼ xí rasaclóo Jesús.

Mateo 26:36-56; Lucas 22:39-53; Juan 18:1-12.