Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 69

Mbioxgonaʼyen racné buñxirop

Mbioxgonaʼyen racné buñxirop

¿NANLO xí caniʼ mbioxgonaʼyen reʼ la? Cayaibybu gonaʼ reʼ chú ngú Eliseo, toib buñguieeu ni Jehová raquiin par guiniʼ xí gac dzú ni sietra, ximod Jehová racné láabu gonybu galrradziguiaʼ. Gonaʼ reʼ diti rimbubu Jehová, portín diti buñ israelita láabu. Por ngú, guisuidyno xigony mbioxgonaʼyen reʼ noʼbu lidx gonaʼ reʼ.

Gonaʼ reʼ buñ siria láabu. Tzeelbu laa Naamán, buñguieeu ni rasanir ló xidalguixo soldad de sirio. Layibu gonásyibu mbioxgonaʼyen reʼ ni nac de gudx Israel, né nigoreʼ xcriat tzeʼel Naamán láabu.

Naamán nap toib galguitz mal ni laa lepra. Galguitz reʼ labúu ronyni que beel laidy buñ rayaani. Ndeʼ ni caniʼ mbioxgonaʼyen reʼ: Pal xpixuanna labúu ñée ronoʼ buñguieeu ni Jehová raquiin par guiniʼ xí gac dzú ni sietra ni noʼ gudx Israel, láabu nasialbu xpixuanna. Ór cú gonaʼ reʼ raiby láani tzeʼel.

Naamán nainy láabu guialbu, por ngú ragoʼbu guicbu tzébu Israel. Órni radxinbu Israel, riebu lidx Eliseo. Ór cú Eliseo rony que xomós guiré né gaibybu Naamán guinich gatz buelt lainy guʼuc Jordán. Naamán radzuitzgulu, né ranibu: ¡Guʼuc ni noʼ xcudxi más sacró guʼuc láani que ni nap Israel! Ralox ranibu ndeʼ rabiguetcabu.

Per toibtica xomósbu raiby láabu: Xpixuanna, pal Eliseo nanab looy ñonylo toib cós nagann, looy ñonylo láani. Por ngú, ¿xigony diti nosi ronylo ni gonabbu looy? Naamán racadiag ni raniʼ xomósbu né ranichbu lainy guʼuc Jordán gatz buelt. ¡Órni ronybu ndeʼ, xpeʼelbu radxiin rac nasacdxiich!

Naamán nigolú rabaladx. Rabiguetbu ronoʼ Eliseo né raibybu: Nigoreʼ ma nandxichi que Dios ni rony adorar Israel láabu ngú toibguielot ló guidopynac Gudxlio. Por ngú, ranába lólo, cuaʼ ni cascad looy. Per Eliseo racapy: Yaca, diti guicaʼya láani. Eliseo nann que mal láani guicaʼbu ni cascad Naamán láabu, portín ni bisial Naamán de xcalguitz ngú Jehová. Per Guehazí xomós Eliseo rasobladx ni Naamán cascad Eliseo.

Por ngú ronybu ndeʼ. Diti xiroʼ ór de goló bireʼ Naamán ronoʼ Eliseo, Guehazí raxony rigaʼl láabu. Guehazí raibybu Naamán: Eliseo bixel naʼ par gaiby looy que ma nainy láabu guicaʼbu tidxo ni cascadlo láabu, portín bidxin buñ ronoʼbu. Ndeʼ toib galrrascú láani. Per Naamán diti nann láani; por ngú raduidybu tidxo xcósbu racaʼ Guehazí.

Órni Guehazí rabiguet lidx, Eliseo ma nann xí ni bunybu. Jehová ma góoch láani láabu. Por ngú, ndeʼ raibybu a Guehazí: Por ni bunyloʼ cós mal reʼ, lepra ni gop Naamán sacaʼlo láani. ¡Né órcuca Guehazí racá lepra reʼ!

¿Xí rasuidyno de guirá ndeʼ? Primer, non gacno xomod mbioxgonaʼyen reʼ né guinino xtiitz Jehová. Ndeʼ labúu gacnéni xidal buñ. Ni rarop, diti gacno farmay xomod góc Naamán órni yása guialbu, siino guisobno ni ranab guirá ni rony ni ná Jehová. Ni rion, diti non guiscúno xomod buny Guehazí. ¿Diti raduidy ndeʼ diitz que labúu guisuidyno xidal cós pal rolno la Biblia la?

2 Reyes 5:1-27.