Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 76

Jerusalén ranitló

Jerusalén ranitló

MA GODUDY más de chii íz de goló buñguieeu ni rony mandary ni laa Nabucodonosor binébu israelitas ni más nap galnann Babilonia. ¡Né nigoreʼ, bibiʼ! Jerusalén cacáa guii, né israelitas ni diti raity rieyibu xomod buñ ni sée press Babilonia.

Bisednaladx, guirá buñguieeu ni Jehová raquiin par guiniʼ xí gac dzú ni sietra, goníyibu que ndeʼ gac pal israelitas diti ratzáyibu mod nacyibu. Per israelitas diti bicadiagyibu tipnés buñguieeu ni bixel Jehová. Bieenyibu dioxh falz xalagary ñony adoraryibu Jehová. Por ni bunyibu sac castigar layibu. Nánno láani portín Ezequiel buñguieeu ni Jehová raquiin par guiniʼ xí gac dzú ni sietra, raiby lóono guirá cós mal ni buny israelitas.

¿Nanlo chú ngú Ezequiel la? Láabu ngú toib mbioxhlas ni Nabucodonosor biné Babilonia chii íz dzú yása guinitló Jerusalén. Ló dzúcu láaca binéyibu Daniel né guionca ximig ni góc laa Sadrac, Mesac né Abednego.

Laʼga Ezequiel noʼsa gudx Babilonia, Jehová ralooy láabu cós mal ni cayac lainy yoʼ xiroʼ ro rac adorar láabu ni noʼ lainy gudx Jerusalén. Jehová raquiin toib galrradziguiaʼ par guieen tzaaybu láani. Ezequiel noʼbu lainy gudx Babilonia, per Jehová raduidy lagary guibíbu guirá cós mal ni cayac lainy yoʼ xiroʼ ni noʼ Jerusalén. ¡Ni rabíbu nadzuʼpy nacní!

Jehová raibybu Ezequiel: Bibiʼ guirá cós nadzab ni cayony buñ lainy yoʼ xiroʼ ro rac adorar naʼ. Bibiʼ cué yoʼ bidza dibuj de beʼel né stipnés nimal. ¡Né bibiʼ israelitas ximod cayenyibu guiráni! Ezequiel rabí tzaay guirá cós reʼ, né racaʼbu guirá ni cayac.

Jehová ranabdiitzbu Ezequiel: ¿Rabilo ni cayony nagach tipnés buñguieeu ni rasanir nisló Israel la? Scú láani, Ezequiel láaca labúu rabí ndeʼ. Noʼ 70 buñguieeu ni cayen dioxh falz, né raniyibu: Jehová diti cabí lóono. Ma diti noʼbu né gudx reʼ.

Ór cú Jehová ralooybu Ezequiel tipnés buñgonaʼ ni sob roʼ toib puert ni nap yoʼ xiroʼ reʼ. Sobyibu cayenyibu dioxh falz ni laa Tamuz. ¡Né bibiʼ veinticinco buñguieeu ni noʼ niis ro ralainy Govitz ro puert xiroʼ reʼ! Ezequiel rabí layibu. ¡Caxixipyibu né cayenyibu Govitz!

Jehová ná: Buñreʼ diti nap respet naʼ. ¡Diti nosi ronyibu cós mal, láaca rieedyibu né ronyibu láani lainy yoʼ xiroʼ ro rony adorarto naʼ! Por ngú Jehová raduidy xtiitz: Sienyibu ximod ngú radzutzi. Né diti sioʼobni naʼ órni guinitlóyibu.

Nosi ma godudy tzón íz de goló Jehová bilooy ndeʼ a Ezequiel, israelitas rac nayaʼyibu nisló Nabucodonosor. Por ngú láabu racalóbu israelitas. Radudy toib íz gorol, babilonios raxalyibu muros xtuny Jerusalén né rioʼyibu né rasaʼijyibu gudxcú. Xidal buñ raity, né buñ ni diti raity rieyibu xomod buñ ni sée press gudx Babilonia.

¿Xigony biduidy Jehová lagary que israelitas nadzuʼpy binitlóyibu? Portín diti bicadiagyibu né diti bisobdiitzyibu xiley Jehová. Ndeʼ raslooy lóono que nigolú rasac gonyno ni ná Dios guirá ór.

Primer raduidyibu lagary que tidxóyen buñ rian lainy gudx Israel. Nabucodonosor raloyñabu toib buñguieeu judío ni laa Guedalías par gann guirá buñreʼ. Per ór cú tipnés israelitas ragaityibu Guedalías. Nigoreʼ buñ radzuibyibu que babilonios guieed guinitló layibu por ni bunyibu. Por ngú rony lafuersbu Jeremías tze né layibu, né raxonyibu rieyibu Egipto.

Ndeʼ rony que ni toib buñ rian lainy gudx Israel. Por 70 íz ni toib buñ rabés lainy gudx Israel. Nigolú scásiʼ rian gudxcú. Per Jehová raduidy xtiitz que sonybu que israelitas guibiguet xcudx órni ma godudy 70 íz. Laʼga radudy guirá íz reʼ, ¿xí rasaclóo israelitas lainy gudx Babilonia? Guibino guidoni.

2 Reyes 25:1-26; Jeremías 29:10; Ezequiel 1:1-3; 8:1-18.