Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 67

Jehosafat nap confianz lóo Jehová

Jehosafat nap confianz lóo Jehová

¿NANLO chú layibu guirá buñguieeu ni noʼ ló dibuj né xí cayonyibu la? Séeyibu ló guerr, né tipnés buñguieeu ni sanir cayoʼolyibu cántico. Looy sigory ranabdiitzlo: ¿Xigony tipnés buñguieeu ni cayoʼol cántico diti néyibu espad né lanza par tíilyibu? Guibino guidoni.

Jehosafat rony mandary gobierno xtuny chop family xiroʼ de Israel. Nabanybu ló dzú ni nabany Acab né Jezabel ni rony mandary chii family xiroʼ de Israel. Per Jehosafat galán rony mandary, né bixiosbu Asá láaca galán buny mandary. Por ngú, por xidal íz buñ ni goyoʼ xan mandary chop family xiroʼ de Israel golésyibu sacrodiguieʼ.

Per nigoreʼ noʼ ni rac né ronyni que buñ radzuiby. Tipnés buñ raiby a Jehosafat: Sieed xidalguixo soldad ni sieed de gudxrop ni laa Moab, Amón né Seír par guicaló looy. Xidal israelitas radopyibu Jerusalén né rayopyibu mod gacné Jehová layibu. Radopyibu lainy yoʼ xiroʼ, né cú Jehosafat raniné Jehová: Jehová, Dios xtunydo, diti nánndo xi gonydo. Diti labúu guicalódo guixo soldad ni sieed. Gocné lóodo.

Jehová racadiag, né ronybu que toibtica buñguieeu ni rony xchiimbu gaiby xcudxbu: Guerr reʼ diti xtunyto láani, nacní xtuny Dios. Diti non tíilto. Colguiguaʼdzu né colguibí ximod Jehová ralaa lóoto.

Raraa stoib gueʼel cú, Jehosafat raiby a gudx: ¡Gapto confianz lóo Jehová! Ór cú raxelbu buñ ni nann roʼol cántico nisló guirá soldad, né órni casaayibu roʼolyibu cántico a Jehová. ¿Nanlo xí rac órni ma cabigaxyibu ló guerr la? Jehová rony que xi enemigyibu racaló saʼ. ¡Né órni israelitas radxiin, guirá soldad ni rianladx layibu ma gueʼet nac!

¿Diti naní góc xcalrrien Jehosafat ni gopbu confianz lóo Dios la? Pal ronyno mod buny Jehosafat láaca naní xcalrrienno.

1 Reyes 22:41-53; 2 Crónicas 20:1-30.