Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 58

David né Goliat

David né Goliat

FILISTEOS rieed stoib buelt par guicaló Israel. Tzón buch lagol David noʼ lad guirá soldad ni nap Saúl. Por ngú toibtica dzú, Jesé raxel David: Gonyné galrro né páa par guá buchlo. Bibiʼ pal labúuga dxeeyibu.

Órni David radxiin ro dxee soldad, raxonybu rayopybu buchbu lagary ro radíil guirá soldad. Buñguieeu filisteo ni nasoʼ ni laa Goliat rareʼ né raxiichbu de guirá israelitas. Por 40 dzú ronybu modreʼ guirá rosil né gueʼel. Racaʼbu rudx: Colguiyopy toib buñ par guicaló naʼ. Pal láabu ronybu gann né ragaitybu naʼ, lóodo sioʼdo xan xomandaryto. Per pal naʼ gony gann né guigati láabu, lóoto sioʼto xan xomandarydo. Rasian láani en lóoto pal labúu guidzelto toib buñ ni labúu guicaló naʼ.

David ranabdiitzbu tipnés soldad: ¿Xí láani guicaʼ ni guigaity filisteo cú, né ni cué Israel ló galnatoy?

Saúl saduidy xidal cós ni rasac láabu, né láaca saduidybu toib xiindzapbu par gac tzeʼel ni gony gann filisteo, ná toib soldad.

Per guirá israelitas radzuibyibu Goliat portín toib buñguieeu nigolú nasoʼ láabu. Nasoʼbu casi 3 metros, né napbu toib soldad ni roʼoy escudo xtunybu.

Tipnés soldad riée né raibyibu Saúl que David nainy tze guicaló Goliat. Per Saúl raibybu David: Diti labúu gonylo láani. Toib mbioxsa looy, né láabu ma xidzú noʼbu ló galsoldad. David racapy: Naʼ bigati toib ós né toib betz ons ni ná ño xiil ni nap bixiosa. Nigoreʼ filisteo ca láaca nacbu xomod toibtica nimal cú. Jehová gacné naʼ. Por ngú Saúl raiby láabu: Goyee, Jehová tzó né looy.

David rietj roʼ guʼuc né ratop gáay guiee nadxipdoot né ragoʼbu láani lainy xmorralybu. Ór cú riaʼpybu né honda xtunybu par guicalóbu Goliat. Goliat diti raluladx láani. Láabu ronybu pensary que diti naganni guigaitybu David.

Godaʼ reʼ, ná Goliat, né guidudi xpeʼelo guá nimal ni rasapy né stipnés nimal. Per David racapy: Looy cacalólo naʼ né toib espad né toib lanza, per ni cayacné naʼ ngú Jehová. Dzureʼ Jehová guiduidy looy ladxñaya né guigati looy.

Nigoreʼ David raxony ronoʼ Goliat. Rabébu lainy xmorralybu toib guiee, ragoʼbu láani lainy honda xtunybu, né rasalbu guiee reʼ né guidopy xfuersbu ronoʼ Goliat. ¡Guiee cú riaʼisyni guic Goliat, né Goliat riab layoo! Filisteos órni rabíyibu Goliat, ni racné layibu par gonyibu gann ló guerr, ma náaxh layoo raxonyibu. Israelitas racanal layibu né ronyibu gann guerr.

1 Samuel 17:1-54.

PAR GANNLO MÁS

BISUIDY XIINLO

David gop balory

Bíil historia ni sieed ló la Biblia né bisuidy ximod David gop balory.