Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 40

Moisés raguin xiac ló guiee

Moisés raguin xiac ló guiee

RADUDY xidal íz, ¡10 íz, 20 íz, 30 íz né 39 íz! Né israelitas noʼsayibu ló yoovich. Per guirá íz reʼ Jehová ran xcudx. Jehová rayaʼan layibu né maná. Jehová ragonés layibu né xcaay rodzu né toib guii órni rasaló rioʼ gueʼel. Láaca diti bioox xhapyibu, né diti bioʼob ñeʼyibu.

Ndeʼ primer beʼo de 40 íz de goló bireʼyibu Egipto. Nigoreʼ israelitas ma noyibu Qadés stoib buelt. Lagary reʼ biguaʼyibu órni doce buñguieeu goyee biláach Canaán né mápa mer guisaʼ 40 íz de goló bireʼyibu Egipto. Míriam bisan Moisés goitybu lagary reʼ ni góc laa Qadés. Né xomod dzúcu nigoreʼ láaca noʼsa galnagan.

Buñ ni dxee reʼ diti labúu radzel nís par gueʼ. Rieyibu ronoʼ Moisés né ratzotz roʼyibu: Más galán ngú ñaityno. ¿Xigony goleʼlo lóodo lainy gudx Egipto né bitnélo lóodo lagary reʼ ro diti sacró nac, né ro xitcal ragaʼ? Reʼ yadi galrro, yadi higos, yadi balach, yadi granad. Diti noʼ ni tidxóyen nís par gueʼ buñ né nimal.

Órni Moisés né Aarón rieyibu yoʼ ro rac adorar par guininéyibu Dios, Jehová raiby a Moisés: Bitop gudx né nisló guiráyibu goniné guiee ni rabilo ca. Ló guiee reʼ sadaa siil nís par gueʼ guiráyibu né par gueʼ guirá xinimalyibu.

Ór cú Moisés ratop guirá buñ, né ranibu: ¡Colguicadiag, lóoto ni diti nap confianz lóo Dios! ¿Aarón né naʼ non cuédo nís ló guiee reʼ par lóoto la? Ór cú Moisés raguin xiac ló guiee reʼ chop buelt, né rasaló radaa siil nís ló guiee reʼ. Ma noʼ siil nís par guirá buñ né guirá nimal ni nonéyibu cú.

Per Jehová radzuitznébu Moisés né Aarón. ¿Nanlo xigony la? Portín Moisés né Aarón goníyibu que layibu ngú ni goleʼyibu nís ló guiee cú. Per ni buny láani ngú Jehová. Né portín Moisés né Aarón diti goníyibu ni nigolú, por ngú Jehová raniʼ que gony castigar layibu. Lóoto diti sonyto que xcudxi tzó lainy gudx Canaán, ná Jehová.

Diti xidzú israelitas rareʼyibu lagary ni góc laa Qadés. Né láaca diti xidzú radxiinyibu laidy dainy ni góc laa Hor. Laidy dainy reʼ goity Aarón, par ló dzureʼ ma napbu 123 íz. Israelitas nigolú nabann noyibu por ni goity Aarón, por ngú ribdxaʼyibu por ló treint dzú. Eleazar bian xalagary bixiosbu xomod ni rasanir nisló israelitas, par gony adoraryibu Jehová lainy gudx Israel.

Números 20:1-13, 22-29; Deuteronomio 29:5.