Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 23

Xpacaʼal Faraón

Xpacaʼal Faraón

MA GODUDY chop íz né José noʼsabu press. Né ni ragoʼ ni reʼ Faraón digundi guisednaladxbu José. Ór cú toibtica gueʼel Faraón raniʼ xcaʼal chop buelt ni diti biembu, né diti nambu ximod rarexani. ¿Rabilo láabu natiasybu ca la? Órni raraa gueʼel raxelcaʼbu guirá buñnan, né ranibu xí goní xcaʼalbu. Per layibu diti labúu raibyibu a Faraón ximod rarexa bacaʼal reʼ.

Nigoreʼ buñguieeu ni ragoʼ ni reʼ Faraón rasetnaladxbu José. Raibybu Faraón: Órni naʼ goyoʼya press goyoʼ toib buñguieeu ni labúu rabexa bacaʼal. Ór cú Faraón rabébu José press.

Faraón gochbu José xí goní xcaʼalbu: Bibiʼya gatz vac nadann móz. Né láaca bibiʼya gatz vac ni nigolú naguitz. Né guirá vac guitz godaibymu guirá vac nadann.

Né ni rarop ni goní xcaʼala láaca bibiʼya gatz doo mbochdot né niguyaa ni canís laidy toibsi yac. Ór cú bibiʼya gatz doo ni bársi nac né nabich. Né gatz doo ni bársi nac godaibyni a gatz doo mbochdot cú.

José raibybu Faraón: Guiropca bacaʼal reʼ toibsi mod rarexani. Gatz vac nadann né gatz doo mbochdot rarexani gatz íz, né gatz vac naguitz né gatz doo ni bársi nac láaca rarexani gatz íz. Gatz íz sioʼgolu galrro lainy gudx Egipto né gatz íz sioʼ govinn galrro.

Por ngú, José raibybu Faraón: Golú toib buñguieeu ni nigolú nann né biduidy dxiinreʼ láabu par guitopbu galrro ló gatz íz ni sioʼgolu ni guá buñ. Ór cú buñ diti saity de galrralán órni guidxin gatz íz de govinn galrro.

Faraón rioladx ni raiby José láabu. Né golúbu José par guitop xiroʼ galrro. José ngú ni canal xiitz Faraón ni nac buñxirop lainy gudx Egipto.

Radudy xhoon íz, galrralán má gosaló, ór cú José rabí tipnés buñguieeu ni sieed ronoʼbu. ¿Nanlo chú layibu la? ¡Layibu ngú chii buch lagolbu! Jacob, bixiosyibu bixel layibu Egipto portín ma cará galrro lainy gudx Canaán. José bimbu guirá buch, per layibu diti bimbuyibu José. ¿Nanlo xigony la? Portín José ma nigox nac né ma gadzé clas lairy nócbu.

José rasetnaladx dzú nacbu mbioxien goní xcaʼalbu que guirá buchbu sieed caxixip nislóbu. ¿Rasetnaladxlo órni bíil lo de láani la? Por ngú José raduidy cuent que Jehová bixel láabu Egipto, né por toib razón galán. ¿Nanlo xí rony José la? Guibino guidoni.

Génesis 41:1-57; 42:1-8; 50:20.