Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 22

José noʼ press

José noʼ press

JOSÉ nap diecisiete íz órni noʼ ni siné láabu Egipto. Lagarycu rasiʼ toib buñguieeu láabu, ni laa Potifar. Potifar rony xchiin ni rony mandary Egipto ni góc laa Faraón.

Nadip rony José dxiin par xpixuanbu, Potifar. Por ngú órni José gop más íz, Potifar rasian lidx xcuent José. Per ¿xigony biab José press? Láani ngú xtol tzeʼel Potifar.

Órni José ranís radxinbu racbu toib buñguieeu móz, tzeʼel Potifar nainy láabu que José gatné láabu. Per José nann que pal gonybu ndeʼ mal láani, né diti rasaguelbu. Tzeʼel Potifar radzuitzgulu. Por ngú órni tzeelbu radxiin rioʼ ronoʼbu láabu rascúbu né ranibu: ¡José buñ mal láabu buny lafuersbu naʼ par ñatnéya láabu! Potifar raluladx ni raiby tzeelbu láabu, né radzuitznébu José. Por ngú rasalbu José press.

Ni ran lainy press cú raduidy cuent que José nigolú buñtzay láabu. Por ngú ronybu que José gacné láabu gann a guirá ni noʼ press. Godudy dzú Faraón bidzuitz né ni ragoʼ ni reʼbu né láaca bidzuitzbu né ni goleʼ xpáabu, né rasalbu chop biinreʼ press. Toibtica gueʼel, cada toib biinreʼ goní toib xcaʼalyibu ni diti bieenyibu. Pero diti gonyibu ximod rarexa ni goní xcaʼalyibu. Raraa stoib gueʼel cú José raiby layibu: Colgaiby naʼ xí goní xcaʼalto. Né ór cú José né galnaní xtuny Dios, rabexa xí láani ngú goní xcaʼalyibu.

José raiby a ni ragoʼ ni reʼ Faraón: Ló tzón govitz ma sareʼlo press, né sagoʼlo ni gueʼ Faraón stoib. Por ngú, José raiby láabu: Órni ma bireʼlo, goní de naʼ nisló Faraón, né gocné naʼ par guiréya reʼ. José raiby a ni goleʼ xpáa Faraón: Ló tzón govitz Faraón guigaity looy.

Ló tzón govitz rac guirá ni goní José. Faraón ragaity ni rabeʼ xpáabu, per ni ragoʼ ni reʼbu rabébu ngú press né rasaló rony xchiimbu stoib. ¡Per ni ragoʼ ni reʼ Faraón rialadxbu José! Diti ranibu xitcal de José nisló Faraón, né por ngú José diti rareʼbu press.

Génesis 39:1-23; 40:1-23.