Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

Xi libriya ni rasuidy historias xtuny la Biblia

 HISTORIA 10

Toib guiérodann

Toib guiérodann

GUIRÁ buñ ni bian fuer bibanyibu suusi antes. Diti ma ronyibu crer guieed toib guiérodann. Nigolú bixiichyibu de Noé, per galraxiich xtunyibu diti xidzú goclani.

Tisintiempsi gosaló biab guié. Biabni de guibá, xomod raxú buñ nís por cubet. ¡Guirá ni goní Noé nigolú gocni! Per ma diti noʼ chú labúu ñoʼ lainy arca ni bisaʼ Noé, portín Jehová ma bisiegdxiich roʼ xpuert arca cú.

Naguel rolach bidzaguelni de nís. Nís bixonyni xomod guʼuc ni siné siil nís. Golanyxanni yac, bituidydainyni guieerop né nigolú ruid bunyni. Buñ bidzuiby né bunyni que ñiápyibu laidy dainy ni más nasoʼ. ¡Balaati goniiny layibu nacadiagyibu Noé né ñoʼyibu lainy arca dzú xobialsani! Per nigoreʼ ma goduidy ór.

Nís biápyni né biápyni más, cuarent dzú né cuarent goxin goyoʼ guié. Nís cú naguel biápyni né bunyni que guirá dainy ni más nasoʼ bian lainy nís. Gocni xomod goní Dios, guirá buñ né nimal ni bian fuer goity. Per guirá buñ né nimal ni goyoʼ lainy arca cú bilaa.

Noé né guirá xiin bunyibu toib galán dxiin ni bisaʼyibu arca. Nís cú golís arca reʼ né láani bisoblóni. Órni bilox góc guiérodann reʼ gosaló biraa né gonaa lóo govitz. ¡Móz bienni ór cú! Pórsi nís goyoʼ guirá lad. Nosi ni goyoʼ cú gocni arca ni casobló.

Ma diti goyoʼ buñ ni góc laa Nefilim. Ma diti sonyibu mal buñ stoib. Guiráyibu goity, né ni gosann layibu, né guirá buñ mal. ¿Xí góc né bixiosyibu?

Bixios guirá Nefilim reʼ diti gocyibu buñ xomod lóono. Nacyibu ángeles ni bietj ló Gudxlio né bibany xomod buñgudxlio. Por ngú, órni bidxin guiérodann reʼ diti goityibu xomod stipnés buñ. Órni bieed guiérodann reʼ ángeles cú bisianyibu de gocyibu buñgudxlio né bibiguetyibu lainy guibá xomod ángeles. Dios ma diti biduidy lagary que ñacyibu ángeles xtunybu stoib, ma ángeles xtuny Buñdzab gocyibu. Biblia rimbu layibu demony.

Dios buny que toib buroʼdant nalopy né nís ni bitné guiérodann reʼ gosaló biaʼach loni. Goduidy gáay beʼo arca reʼ biaʼnni laidy toib dainy. Goduidy xidal dzú, ni dxee lainy arca labúu bibiʼyibu nisfuer né ma labúu bibiʼyibu guic dainy. Nís gosaló biaʼach loni más.

Ór cú Noé bixel toib nimal ni rasapy ni laa biaʼij nareʼ lainy arca. Láamu gosapymu tiprat né bibiguetmu stoib buelt portín diti goyoʼ lagary ro labúu ñanmu. Pór scú bunymu né rabiguetmu rabubymu laidy arca.

Goniiny Noé gann pal ma biaʼach nís ló Gudxlio, por ngú, nigoreʼ bixelbu toib palom ñée nabiʼ. Per palomien reʼ láaca bibiguetmu portín diti bidzelmu lagary ro nabubymu. Noé bixel palomien reʼ rarop buelt, né láamu nigoreʼ ma bibiguetmu né tiplaʼ guixien lainy bichogroʼmu. Nigoreʼ Noé gon que nís cú ma biaʼach loni. Noé bixel palomien reʼ ni rion buelt, né nigoreʼ palomien reʼ ma bidzelmu lagary ro cuésmu.

Nigoreʼ Dios goniné Noé: Bireʼ lainy arca looy né xhomilo né guirá nimal. Layibu goyoyibu lainy arca más de toib íz. ¡Bunysi xpensarylo balaati bibaladxyibu ni ma noyibu fuer stoib né nabanyibu!

Génesis 7:10-24; 8:1-17; 1 Pedro 3:19, 20.

PAR GANNLO MÁS

PELÍCULAS

Noé gosané Dios

Ló xtzú Noé goyoʼ xiroʼgolu cós mal, por ngú Dios bitné toib guiérodann. Noé bisob Dios né láani nacni toib mod par guicanalno. Ló video reʼ saduidylo cuent ximod ni bisob Noé ma gocnéni guirácano.