Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

10 galrranabdiitz ni rony mbioxhlas

 GALRRANABDIITZ 8

¿Xí labúu goni pal noʼ ni ronynudy naʼ né cós yox?

¿Xí labúu goni pal noʼ ni ronynudy naʼ né cós yox?

¿XIGONY RASACNI?

Guirá íz, xidalguixo buñ né máspa mbioxhlas, rioʼ ni ronynudy layibu né cós yox né rioʼ ni ranás lafuers né raxin layibu. *

¿XÍ ÑONYLO?

Buñguieeu ni gonás lafuers Ana bisal láabu layoo, órni biduidybu cuent ma náaxhbu layoo. Ana ná: «Cualóya láabu dada rutigoygaʼlni naʼ. Raabi nacaʼya rudx, per bianyñalni. Bichupiaya, goloñeʼya láabu, godapa né bixonbeʼxa lóbu... per órni bitzaʼisbu gudxil naʼ, ór cú, binit xcalrriena né ma bianyñal nacalóya láabu más».

¿Xí ñonylo pal nasaclolo ni gosaclóo Ana?

GURÚ NÉ BUNY PENSARY

Ná rasaalo né cuidad né naní rioʼlo órni rasagueʼelo, labúu guisaclolo cós mal. La Biblia ná que buñ ni raxonygolú diti guirá ór rony gan né buñ ni naní xcalrrien diti guirá ór rarebuʼ ni rony pensary, «portín tiemp né desgrasy guirá buñ rasaclóo láani» (Eclesiastés 9:11).

Ana diti bimbubu buñ ni gonás lafuers láabu. Per rioʼ ór, nacyibu buñ ni rimbucano o dada nacyibu xfamilno. Natalia pénsa 10 íz napbu órni toib mbioxguieeu gonás lafuers né bixin láabu. Natalia ná: «Primer, nigolú bidzubi né bitoya, diti goodxi láani ni toib buñ».

 LOOY DITI NAPLO DOOL

Ana ronysa pensary que láabu gopbu dool por ni gosaclobu desgrasy cú. Láabu nábu: «Guirási ór rasetnaladxi ni gosacloya goxin cú, né roni pensary que labúu nacalóya láabu más. Golú, binit xcalrriena órni bitzaʼisbu gudxil naʼ, per ná scú, naʼ raabi que noʼ más ni labúu ñoni».

Natalia láaca rioʼobsani láabu. Láabu nábu: «Diti non ñapgoluʼya confianz. Bixiosa né xinaʼya biduidyibu lagary naʼ naguita fuer nosi pal noʼya né beela, per diti bisoba layibu. Por ngú, naʼ rooni pensary que naʼ gocnéya xpecina par diti nasac naganbu nanásbu naʼ. Xfamila nigolú godudy ló galrrioʼob né rasaca que naʼ napa dool. Ngú ni más rasioʼob naʼ».

Pal rasaclo xomod Ana né Natalia, diti guialadxlo que órni toib buñ ranás lafuers né raxin toib buñgonaʼ, diti xcambu racni. Tipnés buñ raniʼ que diti raquiin gonyxiroʼ buñ láani, portín náyibu que buñguieeu scá nac o que buñgonaʼ rayopy láani. Per ni toib buñ raquiin tudy ló galnagan cú. Pal goyoʼ ni gonás lafuers né bixin looy, diti guialadxlo que diti looy goplo dool.

Diti nagan guinino láani, ni nagan ngú guiluladxno láani. Tipnés buñ ni gosaclóo láani diti raniʼyibu ni gosacloyibu né toibyenbu racalóyibu galnagan cú portín ronyibu pensary que layibu gopyibu dool né rieed ló xpensaryibu pór cós ni rabeʼgan layibu. Per pal diti raniʼlo xitcal, ¿chú láabu cayacnélo? ¿Looy la, o buñ ni bixin looy? ¿Xí diti más galán láani guiyopylo galrracné la?

GONIʼ XÍ GÓCLO

La Biblia ná que órni toib buñguieeu ni góc laa Job godudy ló xiroʼ galrrioʼob goniʼbu scareʼ: «¡Guiniya guirá galrrioʼob ni cadudi ló!» (Job 10:1). Sigory pal raniʼlo galrrioʼob ni noʼ lainy xcalnabanylo láaca sacnéni looy. Pal raibylo láani toib buñ ni naplo confianz ngú sacné looy guicalólo galnagan cú né sacnéni looy guireʼlo ló galrrioʼob ni noʼlo ló.

Goniʼ xí rasaclo, par labúu cueʼlo guirá ni nag lainy xcalnabanylo xalagary tobienlo guicalólo láani.

Ngú ni buny Ana, né ngú gocné láabu. Láabu nábu: «Biiy diitz né toib ximiga né láabu gochbu naʼ que ñaabi láani ancianos ni noʼ lainy congregación. Nigolú bibaladxi órni buni láani. Ancianos gorunéyibu naʼ xidal buelt né gochyibu naʼ ni merpa caquiin guicadiaga que naʼ diti napa dool ni gosacloya».

Natalia gochbu láani bixiosbu né xinaʼbu. Láabu nábu: «Nigolú gocnéyibu naʼ. Gochyibu naʼ guiniya ni noʼ lainy xcalnabani, né ngú gocné naʼ par diti nadzutzi né diti ñoʼya nabandii».

Láaca gonabbu lóo Dios né ngú gocné láabu. Láabu nábu. «Ni naʼ goninéya Dios gocnéni naʼ, máspa órni diti goniiny naʼ ñaabi láani stoib buñ. Órni raninéya Dios, labúu rabeʼya guirá ni nag lainy xcalnabani, né ngú nigolú rasialdó naʼ».

Looy láaca saduidylo cuent que noʼ toib «tiemp par guial buñ» (Eclesiastés 3:3). Gop looy né mod rasaclo. Bisaladx sacró. Per ni máspa: biyopy xcalrracné Jehová, Dios ni rasialdó xcalnabanyno (2 Corintios 1:3, 4).

 ¿MA NAPLO ÍZ PAR TZOʼ XINOBYLO LA?

Pal xinobylo rakíil looy gonylo cós yox né láabu, nadip góoch láabu: «¡Diti gonylo nga!» o «¡Diti cannlo naʼ!». Diti guidzuibylo por ni guisiambu looy. Pal rasiambu looy, nacni portín diti ni labúubu. Looy raquiin sanélo toib buñ ni natzaay xcalrrien, toib ni gap respet looy né ni gap respet xiley Dios.

¿RADUIDYBU DIITZ QUE NAINY LÁABU GONYBU CÓS YOX LA?

«Órni gopa 13 o 14 íz, xcompañera ni goyee scuel toibsi né naʼ rascaʼyibu xtoʼ xprasiera né raibyibu na’ cós yox xomod ndeʼ: «Pal ratnélo naʼ, sioladxlo láani» (Carla).

¿Naniʼlo que mbioxhlas reʼ...

  1. ... caguitnési láabu la?

  2. ... cayopy mod sané láabu la?

  3. ... cayonynudy láabu né cós yox la?

«Lainy autobús, toib mbioxhlas gosaló góoch naʼ cós yox né godanbu naʼ. Godapa ñabu né goodxi láabu que diti ñonynudybu naʼ más. Bibiʼbu naʼ xomod toib buñ ni cacá yoʼob» (Claudia).

¿Naniʼlo que mbioxhlas reʼ...

  1. ... caguitnési láabu la?

  2. ... cayopy mod sané láabu la?

  3. ... cayonynudy láabu né cós yox la?

«Toib mbioxhlas guidopynac íz góoch naʼ que rioladxbu naʼ né dada goniʼbu xtiitzbu lóoya. Dipa gosaguela. Rioʼ ór dada rasobñabu barñaya. Guirága ór goodxi láabu que diti ñonybu ngú, per láabu diti goloʼbu cuent naʼ. Toibtica dzú, laʼga caliba xtoʼ zapata, godapbu dxitxana» (Beatriz).

¿Naniʼlo que mbioxhlas reʼ...

  1. ... caguitnési láabu la?

  2. ... cayopy mod sané láabu la?

  3. ... cayonynudy láabu né cós yox la?

Ni gosaclóo Carla, Claudia né Beatriz rarexani né ni ná número 3.

Diti láacani ngú órni toib buñguieeu ronynudy né cós yox a toib mbioxgonaʼ, rayopy mod par sané toib mbioxgonaʼ o raguitnésibu toib mbioxgonaʼ, ¿xigony?

Órni toib buñ raduidy diitz que nainy gony cós yox ronynudybu mbioxgonaʼ né diitz yox, né mbioxgonaʼ reʼ rasac mal. Galnagan reʼ rac xiroʼni más órni ni cayonynudyca láabu diti rasian rony láani.

Pal toib buñ ronynudy xcompañer modreʼ nigolú nadaani, portín dada labúu sanás lafuersbu mbioxhlas reʼ.

^ Párrafo. 4 Ná artículo reʼ cuáni par mbioxgonaʼ, litz ni sitnéni láaca raguiñani mbioxguieeu.