Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Bisuidy xiinlo

 LESIONY 2

Rebeca buny que Jehová nabaladx

Rebeca buny que Jehová nabaladx

Rebeca góc toib buñgonaʼ ni gondxiʼ a Jehová. Tzeelbu góc Isaac ni láaca gondxiʼ a Jehová. ¿Ximod bimbuyibu saʼyibu? ¿Ximod bislooybu que goniiny láabu que Jehová nabaladx? Guisuidydo más de láabu.

Bixios Isaac góc Abrahán né xinaʼbu góc Sara. Layibu bibanyibu gudx Canaán, ro buñ diti buny adorar a Jehová. Per Abrahán goniiny que xiimbu nacaʼ toib buñgonaʼ ni rony adorar a Jehová. Láabu bixelbu toibtica de xomósbu, sigory gócbu Eliezer, par nayopy chú ñac tzeʼel Isaac ló toib lagary ni góc laa Harán, ro golés tipnés xfamily Abrahán.

Rebeca gosaguel ñony dxiin nadip par nabeʼ nís ñeʼ camey

Eliezer biné stipnés xomós Abrahán né xiroʼgolu gosaayibu. Goynéyibu chii camey ni bieʼ galrro né cós ni biscadyibu. ¿Ximod ñony Eliezer par ñan chú láabu ngú buñgonaʼ par Isaac? Órni Eliezer né stipnés mós bidxin gudx Harán, layibu gosagadzuyibu roʼ toib pós, portín Eliezer gon que buñ guieed roʼ pós. Gonabbu lóo Jehová né goniʼbu: Mbioxhlas gonaʼ ni guiduidy nís naʼ né láaca guiduidy nís camey ni sitnéya, ngú mbioxhlas gonaʼ ni rioladxlo gac tzeʼel Isaac.

Ór cú Rebeca bidxin roʼ pós cú. La Biblia rasetlaa que Rebeca nigolú gonaʼ móz góc. Eliezer gonab láabu tidxó nís  par gueʼ, né Rebeca cuapy: Labúu guidudi nís looy né láaca guidudi nís par gueʼ camey ni sitnélo. ¡Bunysi xpensarylo! Camey reʼ calaʼngoluyimu nís né siil nís reʼyimu. Por ngú Rebeca xidal buelt riee roʼ pós rabeʼ nís par guiráyimu. ¿Labúu rabiʼlo ló dibuj ximod Rebeca nigolú nadip cayony dxiin la?... Eliezer nigolú bidziguiaʼbu ximod Jehová cuapy ni láabu gonabbu.

Eliezer biduidybu xidal galrrascad sacroyen cuaʼ Rebeca. Láabu gochbu Eliezer né stipnés mós ni sieed né láabu par ñee lidx xfamilbu. Eliezer góoch layibu xigony Abrahán bixel láabu né ximod Jehová cuapy ni gonabbu. Xfamily Rebeca bibaladx né gosaguelyibu que Rebeca tzee par guicaʼ Isaac láabu.

Rebeca see Canaán né Eliezer par gacbu tzeʼel Isaac

¿Ronylo pensary que Rebeca bioladx nadxin ñac tzeʼel Isaac la?... Rebeca biduidy cuent que Jehová ngú ni bixel Eliezer ronoʼbu. Órni xfamily Rebeca gonabdiitz láabu pal rioladxbu tzeebu Canaán né gacbu tzeʼel Isaac, láabu cuapybu: Scú, rioladxi tzaʼya. Ni maca láabu seebu né Eliezer. Órni Rebeca bidxin Canaán, ronybu galtzeʼel né Isaac.

Por ni Rebeca buny ni ná Jehová, Jehová gocné láabu. Xidzú íz después, Jesús gool né bieedbu de family reʼ. Pal looy naclo xomod Rebeca né ronylo que Jehová guibaladx, Láabu sacnébu looy.

BÍIL LÁANI LÓ LA BIBLIA:

  • Génesis 12:4, 5; 24:1-58, 67