Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 22

Xpiin Jesús rasuidy a stipnés xtiitz Dios né balory

Xpiin Jesús rasuidy a stipnés xtiitz Dios né balory

Ná noʼ galnagan, congregación cristiana raniʼsni naguel

RADUDY chii govitz de goló rabiguet Jesús guibá, ló lanii Pentecostés íz 33, tigayoʼ gaal buñ ni racanal Jesús radopyibu lainy toib yoʼ lainy gudx Jerusalén. Tiptisi bicadiagyibu toib ruid xomod toib buroʼdant, né órcuca biinreʼ rasaló raniʼyibu xidal diitz ni diti rimbuyibu. Per ¿xí ni cayac? Dios biduidy espíritu santo layibu.

Lainy gudxcú bidza buñ ni sieed de xidal lagary par gonyibu lanii Pentecostés. Guiráyibu bidziguiaʼyibu que xpiin Jesús caniʼ diitz ni raniʼyibu. Pedro goniʼ xi ni cayac né láaca bisetlabu que Dios caduidy espíritu xtuny a guirá ni rony ni nábu xomod goniʼ profeta Joel. Né espíritu reʼ ñacné layibu par ñonyibu galrradziguiaʼ (Joel 2:28, 29). Guirá galrradziguiaʼ reʼ bislooyni que nigoreʼ ma nacni congregación cristiana, né ma diti nacni gudx Israel. Par nigoreʼ guirá ni naniiny ñony ni ná Dios nadxin ñacyibu buñ ni racanal Jesús.

Per guirá ni nac xi enemig Cristo gosaló cualóyibu guirá xpiin Jesús. Toibtica dzú gonásyibu né goloʼyibu biinreʼ press, per bidxin toib ángel gueʼel cú né bilaa layibu né goniʼ que diti guisianyibu de guiniʼyibu xtiitz Dios, órni bioní goyoʼyibu lainy templo né gosaló goniʼyibu de Jesús. Buñ ni rasanir ló religión nigolú bidzuitzyibu né buny mandaryibu par diti guisuidyibu xtiitz Dios. Per xpiin Jesús cuapy: «Non guisobno Dios xomod ni rony mandary xalagary guisobno buñgudxlio» (Hechos 5:28, 29).

Buñ mal reʼ diti bireʼganyibu biyopyibu mod nagaityibu guirá ni racanal a Jesús. Tipnés judíos bigotzyibu dool Esteban que caniʼbu mal de Dios, né por ngú bigaityibu Esteban. Toib mbioxhlas ni laa Saulo de Tarso bibiʼ órni bigaityibu Esteban. Después ni góc ndeʼ, Saulo see Damasco par guinásbu guirá ni racanal Cristo. Per laʼga seebu ló néz, toib guii ni bireʼ lainy guibá bisian láabu lochep ór cú bicadiagbu toib rudx ni ná: «Saulo, Saulo, ¿xigony cacanalo naʼ?». Né diti bidzel xcalrriembu xi gonybu, por ngú gonabdiitzbu: «¿Chú looy, Señor?». Rudx reʼ cuapy: «Naʼ ngú Jesús, ni cacanalo» (Hechos 9:3-5).

Godudy tzón govitz, Jesús bixelbu toibtica de xpiimbu ni laa Ananías par nasial bisaló Saulo. Saulo goyonisbu né goniʼbu xtiitz Dios né gan. Conforma godudy íz, buñ bimbu láabu xomod apostol Pablo toib misionero ni bunygoluʼ dxiin.

Xpiin Jesús nosi goniʼyibu de Gobierno xtuny Dios a judíos né a buñ samaritanos. Per toibtica dzú, toib ángel bireʼ lóo toib buñguieeu ni laa Cornelio, toib buñxirop ni rony mandary xidalguixo soldad de gudx Roma, buñguieeu reʼ biluladxbu lóo Dios ni nigolú, né ángel reʼ góoch láabu que guixelcaʼbu apostol Pedro. Órni Pedro né stipnés bidxin lidx Cornelio bisuidyibu de xtiitz Dios a guirá buñ ni golés lidx Cornelio. Laʼga Pedro caniʼ, guirá buñ ni bicadiag layibu cuaʼ espíritu santo, né Pedro buny mandary que tzonisyibu ló laa Jesús. Néz par guibany buñ tipzó ma bixalni par nitisi clas buñ. Scú láani, diitz sacró ma labúu nasuidyibu láani a nitisi clas buñ ló guidopynac Gudxlio.

(Bireʼni ló Hechos 1:1–11:21.)