Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 23

Xidal buñ ran diitz sacró

Xidal buñ ran diitz sacró

Pablo rasaa raniʼbu xtiitz Dios guirá lagary né láaca ló nisdaʼ

PABLO órni ma gócbu cristiano gosaló goniʼbu diitz sacró de Gobierno xtuny Dios né gan. Per nigoreʼ ma láabu non tudybu ló galnagan. Pablo nigolú bunybu dxiin, goyeebu xidal lagary ni noʼ nigolú sit par goniʼbu de Gobierno né ni goniiny Dios nírcu gony par buñgudxlio.

Primer buelt ni bireʼbu par goniʼbu xtiitz Dios stoib lagary, goyeebu toib gudx ni laa Listra né bisialbu toib buñ xot, xidalguixo buñ ni bibiʼ láabu gosaló bicaʼ rudx que Pablo né xcompañerbu Bernabé nacyibu dioxh. Pablo né Bernabé bunyibu rutirigaʼlni layibu par diti nasanadx guirá buñreʼ layibu. Per guirá xi enemig Pablo bikíilyibu guirá buñreʼ par nagasguieyibu Pablo. Layibu bunyibu pensary que Pablo ma goity, per diti gocni scú, Pablo bibiguetbu gudx par gocnébu guirá ni racanal a Jesús.

Tipnés cristianos ni nac judíos goniʼyibu que buñ ni diti nac judíos nasobyibu Xiley Moisés. Par gony reglaryibu galnagan reʼ, Pablo goyeebu ronoʼ apóstoles né ancianos ni noʼ Jerusalén. Layibu bisuidyibu ni ná Escrituras né gonabyibu espíritu santo, né bixelyibu guiich ló guirá congregaciones né buny mandaryibu que diti guienyibu dioxh, que diti guáyibu runy, né beʼel ni nap runy né que diti gonyibu galyoxh. Guirá mandary reʼ nigolú biquiinni per diti biduidyni diitz guisobyibu ni ná Xiley Moisés (Hechos 15:28, 29).

Ni rarop buelt ni bireʼbu par goniʼbu xtiitz Dios stoib lagary, goyeebu gudx Berea, nigoreʼ gudxcú riaʼanni ronoʼ gudx Grecia. Judíos ni golés lagarycu cuacuentyibu xtiitz Dios né bisuidyibu Escrituras par guibiʼyibu que nigolú ni casuidyibu. Diti xidzú Pablo bixony portín buñ ná nagaity láabu stoib. Goyeebu dada gudx Atenas ro goniʼbu nisló tipnés buñxirop ro bituidybu toib discurs sacróyen né láani bidxinni lainy xcalnabany guirá buñ ni bicadiag láabu.

Ni rion buelt ni bireʼbu par goniʼbu xtiitz Dios stoib lagary, goyeebu gudx Jerusalén. Órni goyeebu lainy templo, xidalguixo buñ biyopy mod par nagaity láabu. Soldad de gudx Roma gocnéyibu Pablo né goynéyibu Pablo stoib lagary ro gonabdiitzyibu xidal cós a Pablo. Pablo nacbu de gudx Roma por ngú buñreʼ biduidy lagary láabu ñeebu nisló Félix ni rony mandary. Judíos biaʼñal naslooyibu que Pablo nap dool. Ná scú, Festo ni goyoʼ xalagary Félix gosaguelbu que judíos nagaity Pablo. Par diti ñacni scú Pablo gonab tzee nisló Cesar, né Festo gosaguel (Hechos 25:11, 12).

Pablo biaʼpybu lainy bark ni see Italia portín lagarycu guiniʼbu nisló jueces per bark reʼ bibixni né Pablo godudybu invierno ló toib isla ni laa Malta. Órni bidxinbu gudx Roma golésbu lainy toib yoʼ ni godixyibu por chop íz. Ná gon soldad láabu, goniʼbu de Gobierno xtuny Dios né gan a guirá ni goyguen láabu.

(Bireʼni ló Hechos 11:22–28:31.)